-rat१७p६.jpg-
26O37884
चिपळूण : शहरातील विरेश्वर तलाव येथील बाकडी मोडली आणि खेळणीही तुटली आहेत.
---
चिपळुणातील ऐतिहासिक विरेश्वर तलावाकडे दुर्लक्ष
तुटलेली बाकडे, नादुरूस्त खेळणी ; गैरप्रकारांमुळे परिसरातील नागरिक त्रस्त
सकाळ वृत्तसेवा
चिपळूण, ता. १७ ः शहरातील ऐतिहासिक विरेश्वर तलावाची अवस्था दिवसेंदिवस खालावत चालली आहे. तलाव परिसरातील बाकडे तुटलेली असून, लहान मुलांसाठी असलेली खेळणीही नादुरूस्त झाली आहेत. त्यामुळे सुटीच्या काळात मुलांना खेळण्यासाठी योग्य सुविधा उपलब्ध नसल्याने पालकांमध्ये नाराजी आहे.
पालिकेकडून काही वर्षांपूर्वी तलावाची दुरुस्ती करण्यात आली होती; मात्र त्यानंतर देखभालीकडे दुर्लक्ष झाले आहे. तलाव परिसरात काही ठिकाणी मद्यपान, अयोग्य वर्तन यांसारखे प्रकार वाढले असून, नागरिकांना त्याचा त्रास सहन करावा लागत आहे.
तलावाभोवतीची संरक्षक भिंतही ठिकठिकाणी तडकली आहे. लोटे एमआयडीसीतील काही कारखानदारांनी सामाजिक दायित्व विभागातून आर्थिक निधी देत येथे निसर्ग गॅलरी उभी केली होती. या गॅलरीमुळे येथे येणाऱ्या मुलांना विविध पक्षी, प्राणी आणि वनस्पतींची माहिती मिळत होती. गॅलरीची देखभाल न राखल्यामुळे ती तोडून टाकण्यात आली आहे. तलावात दोन ठिकाणी चौथरे बांधण्यात आले होते तेही नादुरूस्त झाले आहेत. पालिकेने या तलावाची तातडीने दुरुस्ती करावी, अशी मागणी नागरिकांमधून केली जात आहे.
---
कोट
तलावात पाणी आहे. परिसरात झाडी आहेत. पालिकेने ओपन जिमसारखी चांगली सुविधा येथे उपलब्ध करून दिली आहे. तलावाच्या सुशोभीकरणाकडे पालिकेने लक्ष दिले तर शहराच्या आणि तलावाच्या सौंदर्यामध्ये आणखीन भर पडेल.

- नित्यानंद भागवत, सामाजिक कार्यकर्ते, चिपळूण