काळा बाजार करणाऱ्या
विक्रेत्यांवर कायदेशीर कारवाई
कृषी विभाग; खरिपासाठी १२ हजार ५५० टन खत मंजूर
रत्नागिरी, ता. २० ः खरीप हंगामापूर्वी जिल्ह्यातील खतांची खरेदी-विक्री मोठ्या प्रमाणात होणार आहे. त्या वेळी खतांचा काळा बाजार, साठेबाजी किंवा जादा दराने विक्री होऊ शकते. याबाबत शेतकऱ्यांनी सतर्क राहावे आणि काळा बाजार करणाऱ्या विक्रेत्यांची तक्रार तातडीने करावी, संबंधितावर कडक कायदेशीर कारवाई केली जाईल, असे कृषी अधिकाऱ्यांनी सांगितले.
आगामी खरीप हंगामासाठी रत्नागिरी जिल्ह्यातील शेतकरी बांधवांना खते आणि बियाण्यांची कमतरता भासू नये, यासाठी कृषी विभागाने १९ हजार ७० टन खतांची मागणी केली आहे. त्यापैकी १२ हजार ५५० टन खतांचे आवंटन मंजूर झाले आहे. कोणत्याही परिस्थितीत खतांचा तुटवडा भासू नये म्हणून एमएआयडीसीमार्फत जिल्ह्यातील २३ केंद्रांवर संरक्षित साठा करण्यात येणार आहे. त्यामध्ये ६५० टन युरिया आणि ५ टन डीएपी राखून ठेवला जाणार आहे.
कृषी विभागाने शेतकऱ्यांना आवाहन केले आहे की, शेतकऱ्यांनी माती परीक्षण करूनच खतांचा संतुलित वापर करावा. कोकण कृषी विद्यापिठाने भातपिकासाठी हेक्टरी १००:५०:५० (नत्र:स्फुरद:पालाश) या प्रमाणात खत देण्याची शिफारस केली आहे. यामुळे जमिनीचा पोत टिकून राहतो आणि उत्पादन खर्चात बचत होते.