39606

हिंदळेत पुस्तक प्रदर्शनास प्रतिसाद
नांदगाव, ता. २६ ः जागतिक पुस्तक दिनाचे औचित्य साधून हिंदळे ग्रामोन्नती मंडळ वाचनालय, हिंदळे येथे आयोजित पुस्तक प्रदर्शनास उत्स्फूर्त प्रतिसाद लाभला. शासकीय अनुदान २०२५-२६ मधून खरेदी केलेली पुस्तके प्रदर्शनात मांडण्यात आली होती. प्रदर्शनाचे उदघाट्न हिंदळे भंडारवाडा शाळा मुख्याध्यापिका भक्ती चव्हाण यानी केले. यावेळी अंगणवाडी सेविका वैशाली तेली आणि विद्यार्थी उपस्थित होते. प्रदर्शनात कथा, कादंबरी, चरित्र, नाट्य, धार्मिक, प्रवास वर्णन, इतिहास ग्रंथ, शिशू कथा आदी पुस्तके मांडण्यात आली होती. ग्रंथपाल मिताली हिर्लेकर यांनी पुस्तकांचे जीवनातील महत्त्व विशद केले. ग्रंथ हेच आपले खरे गुरू आणि मार्गदर्शक आहेत. वाचनामुळे विचारांना नवी दिशा मिळते, असे त्यांनी सांगितले. सिद्धकला भजन मंडळाच्या सदस्यांनी प्रदर्शनास भेट दिली. वाचनालय संचालक मंडळाचे विशेष सहकार्य लाभले. जिल्हा परिषद सदस्य सुनील पारकर, सरपंच मकरंद शिंदे आदी उपस्थित होते. बाल वाड:मयाचे उदघाट्न ध्रुवी हिर्लेकर हिने केले. वाचनालयाच्या या उपक्रमाचे मान्यवरांनी कौतुक केले.