संदेश कोकाटे यांना
गुणवंत मुख्याध्यापक पुरस्कार
चिपळूण, ता. २८ ः श्रीमती रुक्मिणीबाई माटे शिक्षणसंस्था कामथे संचलित, नूतन माध्यमिक व उच्च माध्यमिक विद्यालय, डुगवे शिरवली (ता. चिपळूण) येथील मुख्याध्यापक संदेश कोकाटे यांना रत्नागिरी जिल्हा माध्यमिक व उच्च माध्यमिक शाळा मुख्याध्यापक संघाचा ‘जिल्हास्तरीय गुणवंत मुख्याध्यापक पुरस्कार’ प्रदान केला. शैक्षणिक क्षेत्रातील त्यांच्या प्रदीर्घ आणि समर्पित सेवेची दखल घेऊन हा गौरव करण्यात आला आहे.
कोकाटे हे जून १९९२ पासून या विद्यालयात मुख्याध्यापक म्हणून कार्यरत आहेत. त्यांच्या मार्गदर्शनाखाली विद्यालयाने दहावी आणि बारावीच्या परीक्षेत सलग अनेक वर्षे १०० टक्के निकालाची परंपरा कायम राखली आहे. केवळ अभ्यासातच नव्हे, तर विज्ञान उपक्रम, क्रीडा स्पर्धा आणि विविध सांस्कृतिक स्पर्धांमध्येही विद्यार्थ्यांनी जिल्ह्यात आपले नैपुण्य सिद्ध केले आहे. संस्थेचे संस्थापक स्व. लोकनेते बाळासाहेब माटे आणि विद्यमान अध्यक्ष डॉ. विजयशेठ माटे यांचा विश्वास त्यांनी आपल्या कार्यातून सार्थ ठरवला आहे. शांत, संयमी आणि प्रामाणिक स्वभाव असलेल्या कोकाटे सरांनी संस्थाचालक, शिक्षक, कर्मचारी, पालक आणि ग्रामस्थ यांच्याशी सलोख्याचे संबंध प्रस्थापित केले आहेत. विद्यालयाच्या जडणघडणीत शालेय समितीच्या अध्यक्षा माधुरी गोखले आणि सर्व सदस्यांचे त्यांना मोलाचे सहकार्य लाभत आहे. या पुरस्काराबद्दल संस्थेचे अध्यक्ष डॉ. विजयशेठ माटे, ग्रामस्थ, पालक, माजी विद्यार्थी तसेच शैक्षणिक आणि सामाजिक क्षेत्रातील मान्यवरांकडून त्यांचे अभिनंदन होत आहे. या पुरस्कारामुळे चिपळूण तालुक्याच्या शैक्षणिक शिरपेचात मानाचा तुरा रोवला गेला आहे.