संगमेश्वरमध्ये आजपासून स्वराज्य महोत्सव
संगमेश्वर ः स्वराज्यरक्षक धर्मवीर छत्रपती संभाजी महाराज यांच्या ३६९व्या जयंतीचे औचित्य साधून महाराष्ट्र शासन आणि धर्मवीर छत्रपती संभाजी महाराज स्मारक समिती (कसबा-संगमेश्वर) यांच्या संयुक्त विद्यमाने ‘स्वराज्य महोत्सव २०२६’ चे दिमाखदार आयोजन करण्यात आले आहे. १३ ते १५ मे या कालावधीत होणाऱ्या या महोत्सवात लाखो रुपयांची बक्षिसे आणि विविध कलावंतांचा मेळा भरणार असून, संपूर्ण संगमेश्वर परिसरात उत्साहाचे वातावरण निर्माण झाले आहे. १३ मे रोजी भव्य मुद्रा भिंतीचित्र (वॉल पेंटिंग) स्पर्धा होणार आहे. महाराष्ट्राची संस्कृती आणि कोकण निसर्गावर आधारित ही स्पर्धा सर्वांसाठी खुली आहे. याच दिवशी ८वी ते १२वीच्या विद्यार्थ्यांसाठी स्वराज्य किल्ले स्पर्धा आयोजित केली आहे. या महोत्सवाचे मुख्य आकर्षण असलेली हिंदवी चित्रकला स्पर्धा १४ मे रोजी होणार असून, छत्रपती संभाजी महाराजांच्या जीवनातील प्रसंगांवर आधारित चित्र काढायचे आहे. इच्छुक स्पर्धकांनी नावनोंदणी १२ मेपर्यंत करणे अनिवार्य आहे.