उदय सामंत यांचा ई वाहनातून प्रवास
रत्नागिरी, ता. १३ ः पंतप्रधान नरेंद्र मोदी यांनी देशातील वाढते प्रदूषण कमी करण्यासाठी आणि इंधनाची बचत करण्यासाठी देशवासियांना इलेक्ट्रिक वाहनांचा वापर करण्याचे आवाहन केले होते. पंतप्रधानांच्या या आवाहनाला सकारात्मक प्रतिसाद देत महाराष्ट्राचे उद्योगमंत्री उदय सामंत यांनी इलेक्ट्रिक मोटार वापरण्यास सुरुवात केली आहे. सोमवारी त्यांनी नवीन इलेक्ट्रिक मोटारीतून प्रवासाला सुरुवात केली. लोकप्रतिनिधी म्हणून समाजात वावरताना आपण जे बदल करतो, त्याचा सकारात्मक संदेश जनतेपर्यंत जातो. जर आपण स्वतः बदलाची सुरुवात केली, तरच जनता त्याचे अनुकरण करेल, असा विश्वास त्यांनी व्यक्त केला. उद्योगमंत्री म्हणून सामंत यांच्याकडे राज्यातील औद्योगिक धोरणांची जबाबदारी आहे. महाराष्ट्रात सध्या इलेक्ट्रिक वाहनांच्या निर्मितीला मोठे प्रोत्साहन दिले जात असून, अनेक नामांकित कंपन्या आपले प्रकल्प राज्यात उभारत आहेत. अशा स्थितीत खुद्द उद्योगमंत्र्यांनीच इलेक्ट्रिक गाडीचा वापर सुरू केल्याने या क्षेत्रातील उद्योजकांना आणि ग्राहकांना मोठा दिलासा मिळाला आहे.