कुणकेश्वर येथे आजपासून
आंबा महोत्सवाचे आयोजन
सकाळ वृत्तसेवा
देवगड, ता. १४ ः कोकणातील पर्यटनाला चालना देण्याबरोबरच स्थानिक पर्यटन आणि सांस्कृतिक वारसा याचा प्रसार करण्याच्या उद्देशाने राज्याच्या पर्यटन विभागाद्वारे तालुक्यातील कुणकेश्वर येथे उद्यापासून (ता. १५) सोमवारपर्यंत (ता. १८) आंबा महोत्सवाचे आयोजन करण्यात आले आहे.
या महोत्सवात आंब्याच्या विविध प्रजाती ‘फार्म टू टेबल’ संकल्पनेतून एकाच ठिकाणी उपलब्ध करून देण्यात येणार आहेत. शेतकऱ्यांकडून थेट ग्राहकांपर्यंत आंब्यांची विक्री होणार असून कोकणातील वैशिष्ट्यपूर्ण स्थानिक उत्पादनेही विक्रीसाठी उपलब्ध राहतील. तसेच आंबा उत्पादक शेतकऱ्यांसाठी शासनाच्या विविध योजनांविषयी माहिती देण्यासाठी मार्गदर्शन शिबिरांचे आयोजनही करण्यात येणार आहे. या महोत्सवात आंब्यापासून तयार करण्यात आलेल्या विविध खाद्यपदार्थांचा आस्वाद घेण्याची संधी पर्यटकांना मिळणार आहे. महोत्सवादरम्यान कोकणच्या पारंपरिक संस्कृतीची झलक दाखविणारे विविध सांस्कृतिक कार्यक्रम आयोजित करण्यात येणार असून त्यामध्ये दशावतार, पालखी सोहळा, स्वराज्य आख्यान, कोकण कलेक्टिव्ह बँड तसेच महिलांच्या सन्मानार्थ होम मिनिस्टर’ कार्यक्रमाचा समावेश आहे. या महोत्सवाचा लाभ घेण्याचे आवाहन करण्यात आले आहे.