उन्हवरेतील विद्यार्थ्यांना
शैक्षणिक साहित्य वाटप
गावतळे : दापोली तालुक्यातील उन्हवरे परिसरातील विद्यार्थ्यांच्या शैक्षणिक प्रगतीस हातभार लावण्याच्या उदात्त हेतूने जागृती मित्र मंडळ (जागृतीवाडी, उन्हवरे) यांच्या वतीने उन्हवरे ग्रुप ग्रामपंचायत येथे मोफत वह्या, छत्र्या व शैक्षणिक साहित्याचे वाटप करण्यात आले. मंडळाचे मुंबई अध्यक्ष पांडुरंग लोंढे आणि ग्रामीण अध्यक्ष कृष्णा पानकर यांच्या मार्गदर्शनाखाली या उपक्रमाचे आयोजन करण्यात आले होते. यामध्ये उन्हवरे, वावघर, फरारे, देगाव आणि गोविंदशेत पांगारी येथील एकूण १० शाळांमधील विद्यार्थी तसेच स्थानिक अंगणवाड्यांमधील बालकांना मोफत वह्या, छत्र्या आणि शैक्षणिक भेटवस्तूंचे वितरण करण्यात आले. या कार्यक्रमाचे अध्यक्षस्थान सदानंद रसाळ यांनी भूषविले. या प्रसंगी विविध शाळांचे मुख्याध्यापक, जिल्हा परिषद सदस्य प्रभाकर गोलंबडे, ग्रुप ग्रामपंचायत सरपंच प्राची पवार, शिवसेना विभागप्रमुख मोहन भागणे, उपसरपंच महेश जावळे आणि पोलीस पाटील शैलेश लोंढे यांनी उपस्थित राहून मंडळाच्या कार्याचे कौतुक केले.