57213

कणकवलीत तिरंगा रॅली उत्साहात
कणकवली : कणकवली कॉलेज, कणकवलीच्या राष्ट्रीय सेवा योजना विभाग, राष्ट्रीय छात्र सेना आणि कणकवली नगरपंचायतीच्या संयुक्त विद्यमाने ‘हर घर तिरंगा अभियान २०२६’ अंतर्गत शहरातून तिरंगा रॅली काढण्यात आली. वरिष्ठ आणि कनिष्ठ महाविद्यालयातील विद्यार्थी, प्राध्यापक, शिक्षकेतर कर्मचारी आणि नगरपंचायतीचे कर्मचारी मोठ्या संख्येने सहभागी झाले. रॅलीचा प्रारंभ नगराध्यक्ष संदेश पारकर, कणकवली कॉलेजचे प्राचार्य युवराज महालिंगे, मुख्याधिकारी गौरी पाटील यांनी केला. महाविद्यालयाच्या परिसरातून सुरू झालेली तिरंगा रॅली कणकवली बाजारपेठेतून मार्गक्रमण करत बसस्थानकापर्यंत पोहोचली. विद्यार्थ्यांनी हातात तिरंगा ध्वज घेऊन देशभक्तीपर घोषणा देत नागरिकांमध्ये राष्ट्रप्रेम, राष्ट्रीय एकात्मता आणि राष्ट्रध्वजाविषयी आदराची भावना जागृत केली.