प्रलंबित मागण्यांसाठी
‘रेल रोको’चा इशारा
रत्नागिरी, ता. १६ : कोकण रेल्वे प्रकल्पग्रस्तांच्या विविध प्रलंबित प्रश्नांवर चर्चा करण्यासाठी कोकणभूमी प्रकल्पग्रस्त कृती समितीची सभा खेडशी येथील महालक्ष्मी मंदिर सभागृहात झाली. रत्नागिरी, सिंधुदुर्ग व रायगड जिल्ह्यांतील पदाधिकारी, प्रकल्पग्रस्त सभासद या वेळी उपस्थित होते.
समितीचे अध्यक्ष संतोष चव्हाण यांनी प्रकल्पग्रस्त उमेदवारांची वयोमर्यादा ४५ वर्षांपर्यंत वाढवल्याबद्दल कोकण रेल्वे प्रशासनाचे स्वागत केले. मात्र, डी ग्रुप भरतीतील नकारात्मक गुणांकन रद्द करावे, तसेच ४५ वर्षांपर्यंतच्या उमेदवारांसाठी १ किलोमीटर धावणे व ३५ किलो वजन घेऊन १०० मीटर धावण्याची कठीण शारीरिक चाचणी रद्द करावी, अशी मागणी समितीने केली.
प्रकल्पग्रस्तांच्या प्रत्येक कुटुंबातील एका व्यक्तीला नोकरी देण्याच्या आश्वासनाची अंमलबजावणी करावी आणि मेरिट लिस्टची अट रद्द करावी, अशीही मागणी केली. याबाबतचे निवेदन कोकण रेल्वेचे व्यवस्थापकीय संचालक संतोष झा, तसेच तिन्ही जिल्ह्यांतील आमदार-खासदारांना पाठवण्यात येणार आहे. भरतीपूर्वी मागण्यांवर योग्य निर्णय न झाल्यास कोकण रेल्वे रोखून ‘रेल रोको’ आंदोलन छेडण्याचा इशारा समितीने दिला. सभेला कार्याध्यक्ष विनायक मुकादम यांच्यासह तिन्ही जिल्ह्यांतील पदाधिकारी व सदस्य उपस्थित होते.