‘संस्कृत केंद्रा’तर्फे चार ग्रंथांचे प्रकाशन
सकाळ वृत्तसेवा
रत्नागिरी, ता. १८ : भारतरत्न डॉ. पांडुरंग वामन काणे संस्कृत अध्ययन केंद्रातर्फे चार महत्त्वपूर्ण संशोधन प्रकल्प, पुस्तक, ग्रंथांचे अनावरण झाले. कविकुलगुरू कालिदास संस्कृत विश्वविद्यालयाचे कुलगुरू डॉ. अतुल वैद्य यांच्या हस्ते प्रकाशन झाले. या प्रसंगी उपकेंद्राचे संचालक डॉ. दिनकर मराठे उपस्थित होते.
धर्मशास्त्रातील आंतरविद्याशाखीय संशोधन या इंग्रजी ग्रंथाचे प्रकाशन विशेष आकर्षण ठरले. या ग्रंथाचे प्रमुख लेखक प्रो. मधुसूदन पेन्ना असून प्रा. अविनाश चव्हाण आणि सई ओक हे सहलेखक आहेत. याज्ञवल्क्यस्मृती, नारदस्मृती, पराशरस्मृती तसेच कौटिलीय अर्थशास्त्र यांसारख्या प्राचीन धर्मशास्त्रीय ग्रंथांच्या आधारे आधुनिक विधीशास्त्राशी सांगड घालत धर्मशास्त्राचे आंतरविद्याशाखीय स्वरूप या ग्रंथातून उलगडण्यात आले आहे.
विश्वविद्यालयाच्या प्रकल्पांतर्गत रत्नागिरी उपकेंद्रातील प्रा. कश्मिरा दळी यांनी १९१६ मध्ये प्रकाशित झालेल्या सनातन धर्म : हिंदू धर्म आणि नीतिशास्त्राचे प्राथमिक पाठ्यपुस्तक या इंग्रजी ग्रंथाचा सनातन धर्म या नावाने मराठी अनुवाद केला आहे. सनातन धर्माची तत्त्वे, मूल्यव्यवस्था यांचे सविस्तर विवेचन या पुस्तकात करण्यात आले आहे.