विद्यार्थ्यांसाठी खगोल कार्यशाळा
सकाळ वृत्तसेवा
रत्नागिरी, ता. १९ : राष्ट्रीय अवकाश दिनाचे औचित्य साधून रत्नागिरीतील सातवी ते दहावीच्या विद्यार्थ्यांसाठी एका विशेष खगोल कार्यशाळेचे आयोजन करण्यात आले आहे. खगोलप्रेमी, रत्नागिरी आणि आनंदालय यांच्या संयुक्त विद्यमाने तसेच रत्नागिरी नगरपालिकेच्या सहकार्याने ही कार्यशाळा रविवारी (ता. २३) सकाळी १० ते दुपारी १ या वेळेत माळनाका येथील श्रीमान हिंदूहृदयसम्राट बाळासाहेब ठाकरे तारांगण येथे पार पडणार आहे.
यात सूर्यमालेची सफर घडवण्यात येईल. २D आणि ३D मॉडेल्सच्या माध्यमातून विद्यार्थ्यांना आपली सूर्यमाला प्रत्यक्ष संकल्पनांसह समजून घेता येईल. सूर्य आणि इतर विविध ग्रहांचे आकारमान तसेच त्यांच्यातील अंतराचा स्पष्ट व तुलनात्मक अभ्यास मांडला जाईल. पृथ्वी आणि चंद्र यांच्यातील अंतराचे विशेष २D मॉडेल प्रात्यक्षिकासाठी उपलब्ध असेल. भारतीय अंतराळ संशोधन संस्थेमध्ये (इस्रो) भविष्यात उपलब्ध होणाऱ्या विविध संधी आणि दिशा यावर तज्ज्ञांकडून सखोल मार्गदर्शन केले जाईल.