साखरप्यात भरमसाठ वीजबिले, ग्राहक संतापले
साखरपा, ता. १९ ः साखरपा गाव आणि परिसरातील पंचक्रोशीत महावितरणच्या अजब कारभाराचा थेट फटका सामान्य वीजग्राहकांना बसत आहे. गेल्या दोन महिन्यांपासून मीटर रीडिंग न घेता सरासरी बिले पाठवल्यानंतर, आता दोन महिन्यांचे रीडिंग एकाच बिलात जोडल्याने ग्राहकांना हजारो रुपयांची वाढीव बिले आली आहेत. यामुळे ग्राहकांच्या खिशाला मोठी कात्री लागली आहे.
गेले दोन महिने महावितरणचा कोणताही कर्मचारी गावात रीडिंग घेण्यासाठी आला नाही. त्या काळात सरासरी बिले पाठवली; मात्र, चालू महिन्यात कर्मचाऱ्याने थेट येऊन दोन्ही महिन्यांचे युनिट्स एकाच बिलात जोडले. दोन महिन्यांचे रीडिंग एकत्र आल्यामुळे विजेचा वापर उच्च स्लॅबमध्ये गेला आणि ग्राहकांना चढ्या दराने भरमसाठ बिल आले आहे.
वाढीव बिल दुरूस्तीसाठी साखरपा महावितरण कार्यालयात जाणाऱ्या ग्राहकांना तेथील कर्मचाऱ्यांच्या उर्मट वर्तनाचा सामना करावा लागत आहे. बिल दुरूस्त करायचे असेल तर देवरूख कार्यालयात जा, अशी उत्तरे देऊन ग्राहकांना पिटाळून लावले जात आहे. आधीच महावितरणच्या चुकीमुळे बसलेला आर्थिक फटका, त्यात देवरूखच्या फेऱ्या, प्रवासाचा खर्च आणि मनस्ताप यामुळे नागरिक अत्यंत त्रस्त झाले आहेत. महावितरणने साखरपा परिसरातील वाढीव बिले तातडीने दुरूस्त करून योग्य त्या स्लॅबनुसार आकारावीत, अशी आक्रमक मागणी वीजग्राहकांकडून केली जात आहे.