दापोलीत ऑक्टोबरमध्ये
कोकण बांबू परिषद
सकाळ वृत्तसेवा
ओरोस, ता २० : बांबू शेती, प्रक्रिया उद्योग आणि बांबू आधारित व्यवसायाला चालना देण्याच्या उद्देशाने ‘कोकण बांबू परिषद २०२६’चे आयोजन ८ व ९ ऑक्टोबर रोजी दापोली येथील डॉ. बाळासाहेब सावंत कोकण कृषी विद्यापीठाच्या सर विश्वेश्वरैया सभागृहात केले आहे. परिषदेत बांबू क्षेत्राशी निगडित विविध विषयांवर परिसंवाद, चर्चासत्रांसह क्षेत्रभेटीचे आयोजन केले आहे.
कोकणात बांबू लागवडीस मोठी संधी असून शेतकऱ्यांना बांबू लागवड, व्यवस्थापन, प्रक्रिया, मूल्यवर्धन आणि बाजारपेठेबाबत मार्गदर्शन मिळावे, या दृष्टीने ही परिषद महत्त्वाची ठरणार आहे. बांबू क्षेत्रातील विविध विषयांवर तज्ज्ञांकडून मार्गदर्शन केले जाणार असून शेतकरी आणि या क्षेत्रात काम करणाऱ्यांना थेट संवादाची संधी मिळणार आहे. विशेषतः शेतकऱ्यांसाठी परिषदेत सहभागी होण्याकरिता नोंदणी शुल्क आकारण्यात येणार नसून भोजन आणि राहण्याची व्यवस्थाही मोफत केली आहे. परिषदेत सहभागी होऊ इच्छिणाऱ्यांनी आयोजकांनी उपलब्ध करून दिलेल्या गुगल फॉर्मद्वारे आपली संपूर्ण माहिती भरून नोंदणी करावी. कोकणातील जास्तीत जास्त शेतकऱ्यांनी या परिषदेचा लाभ घ्यावा, असे आवाहन आयोजकांकडून केले आहे. नोंदणीसाठी लिंक : https://forms.gle/s१YkGKofBVxLY४rq९.