58691

कुडाळ कुंभारवाडा शाळेतून
सीमेवर जवानांसाठी राख्या

कुडाळ, ता. २२ : देशाच्या सीमेवर रक्षणासाठी तैनात असलेल्या वीर जवानांप्रती आदर, अभिमान आणि कृतज्ञता व्यक्त करण्यासाठी पीएमश्री जिल्हा परिषद प्राथमिक शाळा, कुंभारवाडा येथील विद्यार्थ्यांनी स्वतः तयार केलेल्या २०० राख्या जवानांसाठी पाठविल्या.
‘तुम्ही सीमेवर लढता म्हणून आम्ही सुरक्षित जीवन जगत आहोत,’ या भावनेतून विद्यार्थ्यांनी हा उपक्रम राबविला. जवानांना राखी बांधणे म्हणजे देशाच्या सीमेवर देशसेवेसाठी उभ्या असलेल्या प्रत्येक वीर जवानाला आपल्या परिवारातील सदस्य मानून त्यांच्याप्रती बंधुभाव व्यक्त करणे, अशी भावना विद्यार्थ्यांमध्ये निर्माण व्हावी, तसेच त्यांच्या मनातील देशभक्तीची ज्योत सदैव प्रज्वलित राहावी, हा या उपक्रमामागील उद्देश होता. यावेळी शिवसेना जिल्हा उपप्रमुख अरविंद करलकर, मुख्याध्यापिका सायली कदम, उपशिक्षक विजय धामापूरकर, गुरुप्रसाद सावंत, वंदना परब, गौरी गोसावी, ऋतुजा गावडे, स्वराली लाड, चैत्राली पाटील, दीपाली मोहिते, कुडाळ औद्योगिक समूह पोस्टचे पोस्टमास्टर विकास वर्मा, गिरीश बोवलेकर आदी उपस्थित होते.