लांज्यात श्रावण मास
पंढरपूर वारी उत्साहात
अकराव्या वर्षी आयोजन ; धार्मिक व अध्यात्मिक कार्यक्रम
सकाळ वृत्तसेवा
लांजा, ता. २३ ः तालुका वारकरी संप्रदायाच्या वतीने आयोजित विशेष श्रावण मास पंढरपूर वारी उत्साहात पार पडली. सलग अकराव्या वर्षी आयोजित या वारीत सहभागी होत शेकडो भाविकांनी धार्मिक आणि अध्यात्मिक कार्यक्रमांचा भक्तिमय आनंद लुटला.
पंढरपूरच्या विठुरायाच्या भेटीसाठी प्रत्येक वारकरी नेहमीच आतुर असतो. हीच परंपरा जपत लांजा तालुका वारकऱ्यांच्या वतीने गेली दहा वर्षे श्रावण मासात विशेष पंढरपूर वारीचे आयोजन केले जात आहे. यंदाचे हे या वारीचे ११ वे वर्ष होते. १८ ते २० ऑगस्ट दरम्यान झालेल्या या सोहळ्यात काकड आरती, विष्णूसहस्रनाम स्तोत्र, तुळशी अर्चन, कीर्तन, नगरप्रदक्षिणा, हरिपाठ, अध्यात्मिक शंका-निरसन, चर्चासत्र आणि काल्याचे कीर्तन यांसारख्या विविध धार्मिक कार्यक्रमांची रेलचेल होती. या वारीत लांजा, रत्नागिरी, संगमेश्वर, राजापूर यांसारख्या स्थानिक भागांसह ठाणे, मुंबई व पेन येथील सुमारे ७५ वारकरी-भाविकांनी सहभाग घेतला होता. लांजा तालुक्यातील गवाणे, पुनस, मठ, आसगे, लांजा, इंदवटी, कोंडये, वनगुले, वाकेड, कुडेवाडी, व्हेळ, आरगाव, आणि वेरवली या गावांतील भाविकांची उपस्थिती लक्षणीय होती.
हा सोहळा सुभाष पवार (मठ), प्रकाश रामाणे (व्हेळ) आणि ज्येष्ठ वारकरी रमेश घुमे (गवाणे) यांच्या मार्गदर्शनाखाली तसेच चंद्रकांत महाराज पवार यांच्या कुशल नेतृत्वाखाली व अध्यात्मिक मार्गदर्शनाखाली पार पडला. सोहळ्यात पहिले कीर्तन मधुकर महाराज शेट्ये (ठाणे) यांचे, तर दुसरे आणि काल्याचे कीर्तन पवार महाराज (वेरवली) यांचे झाले. हरिपाठाचे नेतृत्व सूर्यकांत माने महाराज (मुंबई) यांनी केले.