- rat२४p१.jpg-
26O59302
दापोली ः वणोशी येथील पाककृती स्पर्धेत प्रथम क्रमांक मिळालेल्या प्रिया घडशी यांना पारितोषिक देताना कृषी विद्यापीठाचे विषय विशेषज्ज्ञ डॉ. महेश कुलकर्णी व डॉ. रणजित महाडिक.
---
रानभाजी पाककृतीत ‘घडशी’ प्रथम
वणोशीत महोत्सव; लाडू, खीरीने वेधले लक्ष
सकाळ वृत्तसेवा
दापोली, ता. २४ ः पावसाळ्यात सहज उपलब्ध होणाऱ्या रानभाज्यांची ओळख नव्या पिढीला व्हावी, या उद्देशाने वणोशी येथे आयोजित ‘रानमाया’ रानभाजी प्रदर्शनाला उत्स्फूर्त प्रतिसाद मिळाला. या प्रसंगी घेण्यात आलेल्या पाककृती स्पर्धेत प्रिया घडशी यांनी प्रथम क्रमांक पटकावला.
डॉ. बाळासाहेब सावंत कोकण कृषी विद्यापीठांतर्गत कृषी महाविद्यालय, दापोलीच्या ग्रामीण जागरूकता कार्यानुभव कार्यक्रमाअंतर्गत कृषीस्नेही व कृषीसखी गट तसेच कृषी विस्तार शिक्षण विभागातर्फे या प्रदर्शनाचे आयोजन केले होते. या प्रदर्शनात सुमारे ४० प्रकारच्या रानभाज्यांचे नमुने मांडण्यात आले. रानभाज्यांचे पोषणमूल्य, आरोग्यविषयक महत्त्व, संवर्धन, प्रक्रिया, मूल्यवर्धन आणि विपणन याबाबत उपस्थितांना माहिती देण्यात आली. डॉ. आशिष शिगवण यांनी ‘रानमाया’ प्रदर्शनाची ओळख करून दिली. रानभाज्यांचा आहारातील वापर वाढावा यासाठी पाककृती स्पर्धाही घेण्यात आली. महिलांनी रानभाज्यांपासून सुमारे ४५ विविध नावीन्यपूर्ण पदार्थ तयार केले. रानभाजी लाडू, भारंगीची खीर, करटोली चिप्स, करटोली मोदक, रानभाजी समोसे, सुरणाचा हलवा आदी पदार्थांनी उपस्थितांचे लक्ष वेधले. पाककृतींचे परीक्षण डॉ. प्रवीण झगडे व डॉ. आशिष शिगवण यांनी केले. प्रिया घडशी यांनी रानभाजी लाडू तयार करून प्रथम क्रमांक पटकावला. आदिती परांजपे यांच्या भारंगीच्या खिरीला द्वितीय तर वैशाली कदम यांच्या करटोली चिप्सला तृतीय क्रमांक मिळाला. सुरणाचा हलवा सादर करणाऱ्या तन्वी कदम, करटोली मोदक करणाऱ्या नियती गुरव आणि रानभाजी समोसे तयार करणाऱ्या सानिया आतपणे यांना उत्तेजनार्थ पारितोषिके देण्यात आली.