चित्पावन ब्राह्मण मंडळाचा
कीर्तन सप्ताह उत्साहात
रत्नागिरी, ता. ३० ः अखिल चित्पावन ब्राह्मण विद्यार्थी सहाय्यक मंडळ, रत्नागिरी तर्फे श्रावण कीर्तन सप्ताहाचे आयोजन केले होते. यंदाचे हे कीर्तन सप्ताहाचे पंधरावे वर्षे होते. गेल्या वर्षी प्रमाणे याही वर्षी हा कीर्तन सप्ताह चक्री स्वरूपात साजरा झाला. दापोली परिसरातील सात गावांची यासाठी निवड केली होती.
रत्नागिरी येथील मंडळाच्या जोशी पाळंद मधील भगवान परशुराम सभागृहामध्ये महेंद्र अनंत पंतमिराशी यांचे १६ ऑगस्ट रोजी कीर्तन झाले. त्यानंतर १७ रोजी श्री सप्तेश्वर देवस्थान पंचनदी येथे मंदार गोखले यांचे कीर्तन झाले. १८ रोजी श्री एकनाथ देवस्थान हर्णै येथे आणि १९ रोजी श्री पूर्वाभिमुख लक्ष्मी नारायण मंदिर, मुरुड या दोन ठिकाणी मंदार गोखले पुणे यांचे कीर्तन झाले.
२० रोजी श्रीराम मंदिर आडे आणि २१ रोजी श्री दुर्गादेवी मंदिर आंजर्ला या ठिकाणी ज्ञानेश जोशी धानोरकर यांची कीर्तनं झाली. २२ रोजी श्री गणपती मंदिर आसूद आणि २३ रोजी श्री वासुदेवानंद सरस्वती टेंबे स्वामी पादुका मंदिर, जालगाव या ठिकाणी अभय घांग्रेकर बुवा यांची कीर्तने झाली.