खेळातून घडते व्यक्तिमत्त्व
शेखर निकम ः पवार महाविद्यालयात क्रीडा दिन
सकाळ वृत्तसेवा
चिपळूण, ता. ३१ : ‘विद्यार्थ्यांनी शिक्षणासोबतच खेळालाही समान महत्त्व दिले पाहिजे. आजच्या धकाधकीच्या जीवनशैलीत शारीरिक तंदुरुस्ती अत्यंत आवश्यक असून, नियमित खेळामुळे शरीर आणि मन दोन्ही सकारात्मक राहतात. विद्यार्थ्यांनी आपल्यातील क्रीडागुण ओळखून ते विकसित करावेत,’ असे प्रतिपादन आमदार शेखर निकम यांनी केले.
खरवते-दहिवली येथील शरदचंद्रजी पवार कृषी महाविद्यालयात भारताचे महान हॉकीपटू मेजर ध्यानचंद यांच्या जयंतीनिमित्त राष्ट्रीय क्रीडादिनी आयोजित कार्यक्रमात ते बोलत होते. या वेळी विद्यार्थ्यांनी विविध क्रीडा उपक्रमांमध्ये उत्स्फूर्त सहभाग नोंदवत ‘खेळ जगा व खेळ जगवा’ असा प्रेरणादायी नारा दिला. या सोहळ्याला सह्याद्री शिक्षणसंस्थेचे अध्यक्ष व चिपळूण-संगमेश्वर मतदार संघाचे आमदार शेखर निकम आणि संस्थेचे कार्याध्यक्ष अनिरुद्ध निकम यांची प्रमुख उपस्थिती होती. महाविद्यालयाचे प्राचार्य डॉ. सुनितकुमार पाटील म्हणाले, विद्यार्थ्यांच्या सर्वांगीण विकासासाठी महाविद्यालयात क्रीडा उपक्रमांना विशेष प्राधान्य दिले जाते. खेळ हा केवळ मनोरंजनाचा विषय नसून शिस्त, संघभावना, नेतृत्वगुण व आत्मविश्वास वाढवणारे माध्यम आहे. ‘खेळ जगा व खेळ जगवा’ हा संदेश दैनंदिन जीवनाचा भाग बनावा.