दापोलीची आमसभा १०ला
सकाळ वृत्तसेवा
दापोली, ता. २ : दापोली पंचायत समितीची २०२६-२७ या आर्थिक वर्षातील आमसभा गुरूवारी (ता. १०) आयोजित केली आहे. सकाळी ११ वाजता राधाकृष्ण मंदिर येथे गृहराज्यमंत्री योगेश कदम यांच्या अध्यक्षतेखाली होणार आहे.
आमसभेच्या अनुषंगाने दापोली तालुक्यातील नागरिकांनी आपली निवेदने पंचायत समिती दापोली कार्यालयाकडे सोमवारी (ता. ७) सायंकाळी ५ वाजेपर्यंत सादर करावीत, असे आवाहन गटविकास अधिकारी गणेश मंडलिक यांनी केले आहे. तसेच प्रत्येक निवेदन स्वतंत्र ए-४ आकाराच्या कागदावर असून ते पाच प्रतींमध्ये सादर करावे, असेही प्रशासनाने स्पष्ट केले आहे. या आमसभेत महावितरण, सार्वजनिक बांधकाम विभाग, जिल्हा परिषद बांधकाम विभाग आदी विविध विभागांशी संबंधित प्रश्न प्रामुख्याने चर्चा होईल. गणेशोत्सव तोंडावर आला असतानाही तालुक्यातील अनेक रस्त्यांची झालेली दुरवस्था नागरिकांसाठी डोकेदुखी ठरत आहे. हा विषय चर्चेला येईल. दापोली-हर्णै हा मुख्य राज्यमार्ग खड्ड्यांमुळे अत्यंत खराब झाला असून, पर्यटनाच्यादृष्टीने हा तालुक्यातील महत्त्वाचा मार्ग मानला जातो. या मार्गावरील खड्डे भरण्याचे काम सुरू असले तरी त्याच्या दर्जाबाबत नागरिक व वाहनचालकांकडून प्रश्न उपस्थित केले जात आहेत.