आंजर्ले किनाऱ्यावर रानडुकराचे पिल्लू
प्राणीमित्रांची धाव ; नैसर्गिक अधिवासात सोडले
सकाळ वृत्तसेवा
दापोली, ता. १५ ः गणेशोत्सवाच्या उत्साहात दापोली तालुक्यातील सुप्रसिद्ध आंजर्ले येथील तरीबंदर समुद्रकिनाऱ्यावर अचानक रानडुकराचे पिल्लू दिसून आले. तसे नागरिकांमध्ये भीतीचे वातावरण निर्माण झाले होते; मात्र, स्थानिक प्राणीमित्र आणि वनविभागाच्या सतर्कतेमुळे या पिल्लाला सुरक्षितपणे पकडून नैसर्गिक अधिवासात सोडण्यात यश आले आहे.
सोमवारी (ता. १४) सायंकाळी आंजर्ले तरीबंदर किनाऱ्यावर नागरिक भटकंती करत असताना अचानक हे रानडुकराचे पिल्लू तेथे आले आणि उपस्थितांच्या दिशेने येऊ लागले. पिल्लू हल्ला करेल या भीतीने नागरिकांची पळापळ झाली; मात्र, उपस्थितांनी न घाबरता तत्काळ स्थानिक प्राणिमित्रांशी संपर्क साधला. ही माहिती मिळताच आंजर्ले ताडाचाकोंड येथील प्राणीमित्र प्रणीत बाईत, वैभव बाईत आणि चिखलतळे येथील प्रफुल्ल मिसाळ यांनी घटनास्थळी धाव घेतली. वनविभागाच्या मार्गदर्शनाखाली त्यांनी अत्यंत कौशल्याने त्या पिल्लाला सुरक्षितपणे ताब्यात घेतले.
त्यानंतर पिल्लाची पाहणी करून त्याला कोणतीही दुखापत झाली नसल्याची खात्री करण्यात आली. वनाधिकारी प्रभू साबणे यांच्या उपस्थितीत या पिल्लाला सुरक्षितपणे नैसर्गिक अधिवासात मुक्त करण्यात आले. या यशस्वी मोहिमेत प्राणिमित्रांसह समाजसेवक राजेश जैन आणि स्थानिक ग्रामस्थांचे मोलाचे सहकार्य लाभले.