लोणेरे - श्रीवर्धन समुद्रकिनारी प्री वेडिंग शूटसाठी पर्यटकांनी पोलिस निरीक्षकालाच मारहाण केल्याची धक्कादायक घटना मंगळवारीआली आहे. या मारहाणीत पोलिस निरीक्षक सुरेश खेडेकर जखमी झाले असून, या प्रकरणी पोलिसांनी 11 जणांना अटक केली आहे.

याबाबतीत श्रीवर्धन पोलिसांकडून मिळालेल्या माहितीनुसार, समुद्रकिनारी काही पर्यटक दारूच्या बाटल्या फोडत जोरदार आरडा ओरडा करत असल्याची तक्रार पोलिसांना दिली. त्यानुसार पेट्रोलिंग करताना पोलिस निरीक्षक एस डी खेडेकर व चालक ठोंबरे यांनी घटनास्थळी जाऊन पर्यटकांना विचारणा केली. त्यांच्याकडे असलेल्या कॅमेरे व ड्रोन कॅमेरा बाबत हटकले असता त्याचा राग लागला. खेडेकर यांना मारहाण करण्यापर्यंत या पर्यटकांची मजल गेली. या मारहाणीत खेडेकर यांच्या डाव्यात हाताला गंभीर दुखापत झाली आहे. 

पोलिसांनी अतुल कन्हैयालाल सुराना, सत्यम अतुल सुराना, शुभम कन्हैयालाल सुराना, वर्षा अतुल सुराना (सर्व राहणार - मार्केटयार्ड, पुणे), प्रचिती रविंद्र सकलेच, संगीता रविंद्र सकलेच (औरंगाबाद), अतुल गोलेचा, विष्णू रामनाथराव गव्हाणे, नागेश मदन पोतदार, मयूर अरुण पोतदार, हर्षल सुनील मसोजी (सर्व राहणार - पुणे) या अकरा जणांविरुद्ध श्रीवर्धन पोलिस ठाण्यात गुन्हा दाखल करण्यात आला आहे. 

अधिक तपास उपविभागीय पोलिस अधिकारी बापूराव पवार हे करीत आहेत. यावेळी बाळा सातनाक, दर्शन विचारे, पिंट्या वेशवीकर, संजीव डेगवेकर, सुरेश करण पाटील, अनंत गुरव, वसंत यादव, राजेश लोहार यांच्यासह दोनशे नागरिक उपस्थित होते. यावेळी आरोपीवर कठोर कारवाई ची मागणी केली. 

श्रीवर्धन मधील पहिलीच घटना - 
श्रीवर्धनमधील समुद्रकिनाऱ्याचे पर्यटकांना नेहमीच आकर्षक आहे. त्यामुळे येथे फोटोशूटसाठी पर्यटकांची खास पसंती आहे. मात्र मंगळवारी पुणे आणि औरंगाबाद येथील दोन कुटुंब प्री वेडिंग शूटसाठी श्रीवर्धन समुद्रकिनारी असताना थेट पोलीस निरीक्षकाला मारहाण करण्याची ही श्रीवर्धन मधील ही पहिलीच घटना आहे. 

पोलिसांवर केलेल्या हल्ल्यामुळे समाजात चुकीचा संदेश जाऊ नये यासाठी आरोपींना कठोर शिक्षा व्हावी यासाठी प्रयत्न करू.
- डी टी सोनके, सहा पोलीस निरीक्षक.