लांजा (रत्नागिरी) : शहरात आठ दिवसांत घडलेल्या आत्महत्येच्या दोन घटनांनी शहर हादरून गेले आहे. राजू कोवळे आणि चेतन कोतवडेकर असे आत्महत्या करणाऱ्यांची नावे आहेत. या दोघांचा मित्र परिवारही मोठा होता. मात्र, त्यांची ही अकाली एक्‍झिट, मित्र परिवाराला जबर धक्का देऊन गेली. या आत्महत्येचे नेमके कारण स्पष्ट झालेले नाही. 

हेही वाचा- जगबुडीने ओलांडली इशारा पातळी : कोकणात पावसाचा जोर वाढला... -

राजू कोवळे या तरुणाने 28 जूनला रात्री साडेआठ वाजता खोलीमध्ये गळफास घेऊन आत्महत्या केली. राजू कोवळे हे लांजा बाजारपेठ सार्वजनिक गणेशोत्सव मंडळाचे सक्रिय कार्यकर्ते होते. कोणत्याही पदाची अपेक्षा न करता मंडळाच्या प्रत्येक कामात त्यांचा नेहमी सहभाग असे. घरगुती कारणाला कंटाळून त्याने आत्महत्या केल्याचा आरोप राजूचा भाऊ प्रल्हाद कोवळे यांनी केल्यानंतर पोलिसांनी त्या दोघांवर गुन्हा दाखल केला. ही घटना ताजी असतानाच लांजा रोहिदासवाडी येथील चेतन कोतवडेकर (वय 28) या तरुणाने चार दिवसांपूर्वी गळफास घेऊन आत्महत्या केली.

हेही वाचा- मुंबई – गोवा महामार्गावरुन जाणारी बस संगमेश्वरात येताच जळून खाक : सुदैवाने सर्व प्रवासी सुखरुप -

चेतन याचे लांजा बाजारपेठेत चप्पल विक्रीचे दुकान आहे. हसतमुख स्वभावाच्या चेतनने चप्पल दुकानाच्या माध्यमातून रोजगाराचे साधन निर्माण केले होते. व्यवसायासाठी त्याने कर्ज घेतले होते, अशी चर्चा आहे. मात्र, कोरोनामुळे मार्चपासून बाजारपेठ बंद असल्याने त्याच्यासमोर मोठा आर्थिक पेच निर्माण झाला होता. यातून त्याने आत्महत्या केली असावी, अशी चर्चा आहे. मात्र नेमके कारण स्पष्ट होत नाही.  

संपादन - अर्चना बनगे