चिपळूण (रत्नागिरी) : निवडणुकीच्यावेळी राजकारण करा पण इंदिरा गांधी सांस्कृतिक केंद्र तत्काळ सुरू करा, अशी सूचना उच्चशिक्षणमंत्री उदय सामंत यांनी शिवसेनेच्या नगरसेवकांना केली. तांत्रिक अडचणीतून मार्ग काढण्यासाठी जिल्हाधिकार्‍यांनी आपले अधिकार वापरावे अशी सूचनाही त्यांनी केली आहे. चिपळूण पालिकेच्या मालकीचे अनेक प्रकल्प तयार होऊन उद्घाटनाच्या प्रतिक्षेत आहेत. हे सांस्कृतिक केंद्र सुरू करण्यासाठी त्यांचा सतत पाठपुरावा सुरु असल्याने मंत्री सामंत हे सांस्कृतिक केंद्राच्या प्रेमात पडल्याचे बोलले जात आहे. 

चिपळूण शहरातील भाजी मंडई तयार होऊन पालिकेने लिलाव प्रक्रिया राबवली. मात्र भाजी विक्रेत्यांनी त्याला विरोध केला. पालिका प्रशासन आणि भाजी विक्रेत्यांमध्ये अनेक बैठका झाल्या. मात्र अद्याप त्यावर तोडगा निघालेला नाही. अशीच अवस्था इंदिरा गांधी सांस्कृतिक केंद्राची झाली आहे. सांस्कृतिक केंद्र तयार झाले आणि नगराध्यक्षा सौ. सुरेखा खेराडे यांनी केंद्राच्या उद्घाटनाचा विषय सर्वसाधारण बैठकीच्या विषय पत्रिकेवर घेतला. त्याला शिवसेना आणि महाविकास आघाडीत सामील झालेल्या मित्र पक्षांनी विरोध केला. 

हेही वाचा - आता प्रयोगशीलतेमधून आधुनिक शेतीला मिळणार प्रोत्साहन; चिपळुणात 18 गावांत मॉडेल व्हिलेज -

निविदा प्रक्रिया न करता सांस्कृतिक केंद्राचे वाढीव काम झाले असल्याची तक्रार महाविकास आघाडीने केली आहे. जिल्हाधिकारी कार्यालयात सुनावणी सुरू असताना मंत्री उदय सामंत यांनी काही महिन्यांपूर्वी सांस्कृतिक केंद्राला भेट दिली होती. केंद्राच्या कामाचे कौतुक करत हे केंद्र मनापासून आवडल्याचे त्यांनी सांगितले. तांत्रिक बाबींची पूर्तता करून सांस्कृतिक केंद्र तत्काळ सुरू करण्याची सूचना त्यांनी प्रशासनाला केली होती. तरीदेखील सांस्कृतिक केंद्राचा पडदा तांत्रिकबाबीत अडकून राहिला. त्यामुळे आज मंत्री उदय सामंत यांनी पुन्हा शिवसेना नगरसेवक, मुख्याधिकारी यांची बैठक घेतली. 

यावेळी मुख्याधिकारी विधाते यांनी तांत्रिक बाबी आणि निविदा प्रक्रियेची माहिती दिली. सांस्कृतिक केंद्राचे काम करणार्‍या ठेकेदाराने वाढीव कामे केली आहेत. नव्याने निविदा प्रक्रिया करताना जुन्या ठेकेदाराला हे काम मिळाले नाही तर त्याचे नुकसान होणार आहे. हा मुद्दाही बैठकीत मुख्याधिकार्‍यांनी मांडला. त्यानंतर मंत्री सामंत यांनी जिल्हाधिकार्‍यांशी संपर्क करून सांस्कृतिक केंद्र सुरू करण्याची सूचना केली आहे. सांस्कृतिक केंद्र किती दिवसात खुले होईल हे नक्की सांगता येणार नाही. मात्र पुढील पंधरा दिवसात तांत्रिक बाबी पूर्ण होतील. अशी अपेक्षा मंत्री सामंत यांनी व्यक्त केली. 

हेही वाचा - पालनकर्त्याच्या दफनानंतर दीड महिना तो तिथेच घुटमळतोय; श्वानाच्या प्रेमाची अनोखी कहाणी -

"एखादी वास्तू तयार होऊन तिचा वापर झाला नाही तर ती लवकर खराब होते. चिपळूण जिल्ह्याची सांस्कृतिक राजधानी आहे. येथील रसिकांसाठी हे केंद्र लवकर सुरू व्हावे अशी माझी इच्छा आहे. त्यामुळे सांस्कृतिक केंद्राचे लवकरच लोकार्पण व्हायला हवे."

- उदय सामंत, उच्चशिक्षणमंत्री