वैभववाडी : जिल्ह्यात पावसाचा जोर कमी झाला असला, तरी काही ठिकाणी अजूनही पडझडीच्या घटना घडत आहेत. वैभववाडी-कोल्हापूर महामार्गावर (Vaibhavwadi-Kolhapur Highway) किरवे ते लोंघेदरम्यान रस्त्यावर पुराचे पाणी आल्यामुळे वाहतूक ठप्प झाली आहे. करूळ घाटात (Karul Ghat) पुन्हा रस्त्यावर डोंगर कोसळला आहे.

जिल्ह्यात गेल्या काही दिवसांपासून सुरू असलेल्या मुसळधार पावसाने विश्रांती घेतली आहे. अधूनमधून काही ठिकाणी वादळी वाऱ्यासह जोरदार सरी पडत आहेत. मात्र, त्यानंतर काही काळ पाऊस पूर्ण उघडीप देत आहे. सोमवारी सायंकाळी तळेरे-कोल्हापूर महामार्गावरील मांडकुली, खोकुर्ले येथील पाणी ओसरल्याने वाहतूक सुरू केली होती.

परंतु, कोल्हापुरात झालेल्या मुसळधार पावसामुळे किरवे ते लोंघेदरम्यान पुन्हा रस्त्यावर पाणी आल्यामुळे हा मार्ग वाहतुकीस बंद केला आहे. त्यामुळे या महामार्गावरील वाहतूक फोंडाघाटमार्गे वळविण्यात आली आहे. एकीकडे पावसाचा जोर कमी झाला असला तरी अनेक ठिकाणी जोरदार वाऱ्यामुळे पडझडीच्या घटना घडत आहेत.

वैभववाडी-गगनबावडा मार्गावरील करूळ घाटरस्त्यावर काल पुन्हा डोंगर कोसळला. दगड, माती आणि झाडांचा भरावाने ६० ते ७० मीटरचा रस्ता व्यापला आहे. सध्या हा घाटरस्ता वाहतुकीस बंद असला, तरी नव्याने बांधण्यात आलेल्या रस्त्याचे दरडीमुळे मोठे नुकसान होत असल्याचे चित्र आहे. जिल्ह्यात आज सर्वत्र पावसाच्या हलक्या ते मध्यम स्वरूपाच्या सरी पडत होत्या.