सिंधुदुर्ग - सिंधुदुर्ग शासकीय वैद्यकीय महाविद्यायलच्या बाबतीत खरे झारीतले शुक्राचार्य हे जिल्ह्याचे दिल्लीत प्रतिनिधित्व करणारे केंद्रीय मंत्री नारायणा राणे आहेत, अशी टीका खासदार राऊत यांनी केली आहे. राणे यांचे नाव घेता शिवसेनेचे नेते विनायक राऊत यांनी अप्रत्यक्षरित्या टोला लगावला आहे. सिंधुदुर्ग येथे एका खासगी वृत्तवाहिनीशी बोलताना त्यांनी प्रतिक्रीया दिली.

यावेळी ते म्हणाले, सिंधुदुर्ग वैद्यकीय महाविद्यालयाच्या बाबतीत खरे झारीतले शुक्राचार्य हे दिल्लीमध्ये प्रतिनिधित्व करणारे माननीय केंद्रीय मंत्री नारायण राणे आहेत. राज्यातील इतर जी काही शासकीय वैद्यकीय महाविद्यालये आहेत. सातारा, अलिबाग, पुणे यापेक्षा सिंधुदुर्ग जिल्ह्यातील शासकीय महाविद्यालयाचे इन्फ्रास्ट्रक्चर आणि फॅकल्टी चांगली आहे. असे असतानाही केवळ आपल्या मंत्री पदाचा दुरुपयोग करून आणि आपल्या स्वतःच्या कॉलेजवर त्याचा परिणाम होत आहे, म्हणून शासकीय वैद्यकीय महाविद्यालयांमध्ये अडचणी आणायचे काम केंद्रीय मंत्री करत आहेत, असा हल्लाबोल त्यांनी केला आहे.

पुढे ते म्हणाले, मी स्वतः दिल्लीमध्ये जाऊन महाविद्यालयाच्या मान्यतेसाठी प्रयत्न करत आहे. मात्र तेथील अधिकाऱ्यांनी अप्रत्यक्षपणे याबद्दल उल्लेख केला आहे. संबंधित केंद्रातील मंत्र्यांशी बोलत असताना त्यांनीही अप्रत्यक्षपणे हा उल्लेख केला आहे. परंतु कोणत्याही परिस्थितीत पुन्हा एकदा आम्ही अपील करणार आहोत आणि न्यायालयात जाऊन मान्यता मिळवण्याचा प्रयत्न करणार असल्याचे विनायक राऊत यांनी सांगितले आहे.