चिपळूण : जुन्या मुंबई-गोवा राष्ट्रीय महामार्गावरील (Mumbai-Goa National Highway) विसावा पॉईंट कोकणात येणाऱ्या प्रत्येकाला भुरळ घालत होता. आता चौपदरीकरणामध्ये नव्याने या पॉईंटची रचना करण्यात आली आहे. जुना डांबरी रस्ता नव्याने करून त्या ठिकाणी हे ठिकाण विकसित करण्यात आले आहे. येथील विहंगम दृश्य पाहून महामार्गाने प्रवास करणारे पर्यटक व प्रवासी येथे आवर्जून थांबून सेल्फीचा आनंद लुटत आहेत.

खेडकडे जाताना परशुराम घाटात (Parashuram Ghat) डाव्या हाताला जुना रस्ता जातो. त्या रस्त्याने वरती गेल्यावर विकसित होणारा विसावा पॉईंट आणि पुढे गेल्यावर जुना पॉईंट आपल्याला पाहायला मिळतो. या ठिकाणी पोहोचल्यावर समोरील विहंगम दृश्य पाहून मन तृप्त होते. या ठिकाणी राष्ट्रीय महामार्ग विभागाच्या वतीने बसण्यासाठी बाकडे, चिरेबंदी पादचारी पथ तयार करण्यात येत आहे.

लवकरच या ठिकाणी झाडेझुडपे आणि शोभिवंत झाडांची लागवड केली जाणार असून, बाग तयार केली जाणार आहे. या ठिकाणी असलेल्या संरक्षक भिंतीवर समोरून दिसणारे वाशिष्ठीचे विहंगम दृश्य चित्रकाराने चितारले आहे. त्याच पद्धतीने श्री परशुराम मंदिराची हुबेहूब प्रतिकृती या ठिकाणी चित्राच्या माध्यमातून साकारण्यात आली आहे. तसेच वाशिष्ठी नदीतून होडी घेऊन जाणारा नावाडी, मगर अशी चित्रे या ठिकाणी साकारण्यात आली आहेत.