सावंतवाडी : रुग्णांना सोईचे व्हावे, यासाठी सावंतवाडीत मंजूर मल्टिस्पेशालिटी हॉस्पिटल कुटीर रुग्णालयाच्या परिसरातच व्हावे, अशी खुद्द राजे खेमसावंत यांच्यासह राजघराण्याची इच्छा आहे. त्यामुळे याच ठिकाणी हॉस्पिटल उभारण्याबाबत शासनाकडून विचार केला जावा, अशी प्रतिक्रिया येथील संस्थानचे युवराज लखम राजेभोसले यांनी दिली. 

यासाठी आवश्‍यक असलेला प्रस्ताव लवकरात लवकर राजघराण्याकडे द्या, असे खुद्द आमच्याकडून माजी पालकमंत्री दीपक केसरकर यांना सांगितले आहे. त्यांनी सुद्धा ते मान्य केले आहे; परंतु काही लोक अन्य ठिकाणी हॉस्पिटल नेण्याच्या गोष्टी करत आहेत, असेही ते म्हणाले. 

शहरात रुग्णालयाच्या परिसरात उभारण्यात येणारे मल्टिस्पेशालिटी हॉस्पिटल अन्य ठिकाणी देण्यासंदर्भात शिवसेनेतील काही मंडळींकडून हालचाली सुरू झालेल्या आहेत. या ठिकाणी असलेली जागा राजकारण्याकडून मिळण्यास अडचणी येत आहेत, असे सांगून यासाठी पर्यायी जागेचा शोध सुरू केला आहे. मात्र, याबाबत राजघराण्याची भूमिका समजून घेतली असता युवराज लखमराज सावंत यांनी आपली भूमिका स्पष्ट केली. 

 हे पण वाचा - सिंधुदुर्गमध्ये सापडले  ११ कोरोना पॉझिटिव्ह ; संख्या पोहोचली १९९ वर...

ते म्हणाले, "येथे कुटीर रुग्णालयाच्या परिसरात असलेल्या जागेत हॉस्पिटल व्हावे, अशी राजघराण्याची इच्छा आहे. सावंतवाडी व परिसरातील लोकांना या ठिकाणी हॉस्पिटल झाल्यानंतर चांगली सेवा सुविधा मिळू शकते. त्या ठिकाणचा परिसर लक्षात घेता पायाभूत सुविधा उभारण्याची गरज नाही. त्यासंदर्भात माजी पालकमंत्री तथा आमदार केसरकर यांनी राजघराण्याशी चर्चा केली होती. त्यांना हा विषय माहिती आहे. आम्ही जागा देणार नाही, अशी भूमिका कधीही घेतली नाही; परंतु काही लोक अन्य भूमिका मांडत आहेत. पर्यायी जागा शोधत आहेत.''

 हे पण वाचा - पावसाळ्यानंतर तिलारी जंगल सफारी बिनधास्त होणार?-