चिपळूण : बाजारेठेत वाढलेली गर्दी लक्षात घेत पोलिसांनी मुख्य रस्त्यावरील चिंचनाका येथे शनिवारी बॅरीकेट्‌स उभारून मार्ग सील केला. तसेच विनाहेल्मेट प्रवास करणाऱ्यांवर दंडात्मक कारवाई करण्यात आली. दिवसभरात 275 जणांवर दंडाची कारवाई करण्यात आली. जिल्हाधिकाऱ्यांनी कोरोनाच्या पार्श्‍वभूमीवर कडक निर्बध लागू केले आहेत. तरीही येथील बाजारपेठेत सकाळी 7 ते 11 च्या दरम्यान खरेदीसाठी मोठी गर्दी झाली होती.

गर्दी कमी होण्यासाठी जिल्हाधिकाऱ्यांनी काही उपाययोजना सुचवल्या आहेत. त्यानुसार येथील पोलिसांनी शनिवारपासून बाजारपेठेत ठिकठिकाणी बॅरिकट्‌स उभारले. सकाळी 11 नंतर बाजारपेठेतील मेडिकल वगळता सर्व दुकाने बंद ठेवण्यात आली आहेत. त्यानंतरही गर्दी होते. त्यामुळे विनाहेल्मेट फिरणाऱ्यांवर दंडात्मक कारवाई सुरू करण्यात आली. चिंचनाका, वडनाका, खेडेकर क्रिडा संकुल, बाजार पोलिस चौकी, बहादूरशेख नाका येथे पोलिस तैनात करण्यात आले होते.

गेले काही दिवस बाजारपेठेत सकाळच्या वेळी भाजीपाला तसेच अत्यावश्‍यक सेवेच्या नावाखाली नागरिकांची गर्दी होत आहे. मात्र आता जुना बसस्थानक व पानगल्ली या दोन्ही ठिकाणी तहसीलदारांनी मनाई आदेश लागू करुन भाग सील केला. यामुळे गर्दी नियंत्रणात येण्यास मदत झाली आहे. दरम्यान रत्नागिरी आणि चिपळूण येथे जिल्हाधिकाऱ्यांनी हेल्मेट सक्ती केली. रविवारी दुचाकीस्वार घरातून हेल्मेट घालून बाहेर पडत होते. हेल्मेट सक्ती लागू झाल्यानंतर रविवारी विनाहेल्मेट दुचाकीस्वारांकडून प्रत्येकी पाचशे रुपये दंड आकारले जात होता. मास्क न लावता फिरणाऱ्यांवर दंडात्मक कारवाई केली जात होती.