Adam Gilchrist IPL : ऑस्ट्रेलियाचा माजी अनुभवी यष्टिरक्षक फलंदाज ॲडम गिलख्रिस्टने जागतिक क्रिकेटमधील इंडियन प्रीमियर लीग (आयपीएल) फ्रँचायजींच्या वाढत्या वर्चस्वावर प्रश्नचिन्ह उपस्थित केले असून, त्यांची सध्याची ‘मक्तेदारी’ची प्रवृत्ती धोकादायक असल्याचे म्हटले आहे.

ऑस्ट्रेलियन फलंदाज डेव्हिड वॉर्नर या हंगामात बिग बॅश लीग (बीबीएल) मधून बाहेर पडून त्याऐवजी अधिक फायदेशीर ‘यूएई टी-२०’ लीगमध्ये खेळू शकतो, या वृत्ताच्या पार्श्वभूमीवर गिलख्रिस्टने ही टिप्पणी केली आहे.

विशेष म्हणजे, मुंबई इंडियन्स, कोलकता नाईट रायडर्स आणि दिल्ली कॅपिटल्स या तीन आयपीएल फ्रँचायजींनी ‘यूएई टी-२०’ लीगमधील संघांमध्ये गुंतवणूक केली आहे. ‘‘डेव्हिड वॉर्नरला बीबीएलमध्ये खेळण्यास भाग पाडले जाऊ शकत नाही. मला हे समजते. यात केवळ वॉर्नरच नाही तर इतर खेळाडूंचाही सहभाग असेल याचीही मला कल्पना आहे. कॅरिबियन प्रीमियर लीगमधील अनेक संघांचे मालक असलेल्या आयपीएल फ्रँचायजींची ही जागतिक मक्तेदारी आहे,’’ असे गिलख्रिस्टने यावेळी म्हटले आहे.

गिलख्रिस्ट पुढे म्हणाला, ‘‘हा काहीसा धोकादायक ट्रेंड आहे, जो खेळाडूंची मालकी आणि त्यांच्या प्रतिभेवर, ते कुठे खेळू शकतात व कुठे खेळू शकत नाहीत यावर एकप्रकारे मक्तेदारी व्यक्त करण्याशी संबंधित आहे.’’

ऑस्ट्रेलियासाठी ९६ कसोटी आणि २८७ एकदिवसीय सामने खेळणारा गिलख्रिस्ट यापूर्वी डेक्कन चार्जर्स हैदराबाद आणि किंग्ज इलेव्हन पंजाब यांसारख्या आयपीएल संघांसाठी खेळला आहे. २००९ मध्ये डेक्कन चार्जर्सने आयपीएलचे जेतेपद पटकावले तेव्हा गिलख्रिस्ट संघाचा कर्णधार होता.

क्रिकेट ऑस्ट्रेलियाला सल्ला

भविष्यात इतर अनेक क्रिकेटपटू देखील वॉर्नरच्या मार्गाचा अवलंब करू शकतात, त्यामुळे गिलख्रिस्टने ऑस्ट्रेलियन क्रिकेट बोर्डाला या प्रकरणात लक्ष घालण्याचा सल्ला दिला आहे. तो म्हणाला, ‘‘जर वॉर्नर ‘सॉरी ऑस्ट्रेलियन क्रिकेट, मी माझ्या भारतीय फ्रँचायजी संघांसाठी वेगवेगळ्या स्पर्धांमध्ये खेळणार आहे,’ असे म्हणाला तर तुम्ही त्याला प्रश्न विचारू शकत नाही, कारण तो त्याचा विशेषाधिकार आहे. त्याने त्याचे आंतरराष्ट्रीय क्रिकेट बाजारपेठेतील ब्रँड मूल्य वाढविलेले आहे. परंतु उपाययोजना करून हे सर्व थांबविणे आवश्यक आहे.’’