वर्ल्ड बॅडमिंटन चॅम्पियनशिप स्पर्धेत कांस्य पदकाची कमाई करणाऱ्या लक्ष्य सेन (Lakhsya Sen) याने ऑल इंग्लंड ओपन बॅडमिंटन चॅम्पियनशिप स्पर्धेत (All England Badminton) नवा इतिहास रचला. पुरुष एकेरीच्या सेमीफायनलमध्ये त्याने मलेशियाच्या ली जी जिया याला पराभूत करत फायनल गाठली. 21 वर्षानंतर पुरुष गटातून एखादा भारतीय बॅडमिंटनपटूनं या स्पर्धेची फायनल गाठली आहे. जागतिक क्रमवारीत 11 व्या स्थानावर असलेल्या सेन याने एक तास 16 मिनिटे चाललेल्या लढतीत 7 व्या क्रमांकावरील जिया याला 21-13, 12-21, 21-19 अशा फरकारने पराभूत केले.

2001 मध्ये पुलेला गोपीचंद यांनी प्रतिष्ठित बीडब्ल्यूएफ सुपर 1000 इवेंटच्या पुरुष एकेरीत फायनल खेळली आणि ती जिंकलीही होती. या दिग्गजानंतर तब्बल दोन दशकानंतर लक्ष्य सेनच्या रुपात भारतीय खेळाडू फायनल खेळताना दिसणार आहे. आतापर्यंत प्रकाश नाथ (1947), प्रकाश पदुकोण (1980 आणि 1981), पुलेला गोपीचंद (2001) आणि सायना नेहवाल (2015) यांच्यानंतर चॅम्पियशिपच्या फायनलमध्ये पोहचणारा तो पाचवा बॅडमिंटन भारतीय खेळाडू आहे. प्रकाश पदुकोण (1981) आणि पुलेला गोपीचंद (2001) या दोघांनीच प्रतिष्ठित स्पर्धा जिंकली आहे.

अल्मोडा येथील 20 वर्षीय लक्ष्य सेनने फायनल मारली तर तो ही स्पर्धा जिंकणारा तिसरा भारतीय खेळाडू ठरेल. जागतिक क्रमवारीत चौथ्या क्रमांकावर असलेल्या चीनी ताइपेच्या चाउ टिएन-चेन आणि नंवर वन विक्टर एक्सेलसन यांच्यातील एकासोबत त्याला फायनल खेळावी लागणार आहे.