न्यूयॉर्क - रशियाचा डॅनिल मेदवेदेव आणि जर्मनीचा ॲलेक्झँडर झ्वेरेव यांनी रविवारी पहाटे झालेल्या अमेरिकन ओपन या टेनिस ग्रँडस्लॅममधील लढतीत प्रतिस्पर्ध्यांना पराभूत करीत पुरुषांच्या एकेरीत आगेकूच केली. मेदवेदेव याने सेबॅस्टियन बेझ याला, तर झ्वेरेव याने ग्रिगोर दिमित्रोव याला पराभूत करीत पुढे पाऊल टाकले. स्वित्झर्लंडचा अनुभवी टेनिसपटू स्टॅन वावरिंका याचा तिसऱ्या फेरीत पराभव झाला. त्यामुळे त्याचे आव्हान संपुष्टात आले.

तिसरा मानांकित मेदवेदेव याने बेझ याच्यावर सरळ तीन सेटमध्ये विजय मिळवला. मेदवेदेव याने बेझ याला ६-२, ६-२, ७-६ असे दोन तास व ४० मिनिटांमध्ये नमवले. १२ व्या मानांकित झ्वेरेव याच्यासमोर १९ व्या मानांकित ग्रिगोर याचे आव्हान होते. मात्र झ्वेरेव याने त्याचा संघर्ष चार सेटमध्ये मोडून काढला. झ्वेरेवने पहिला सेट ६-७ असा गमावल्यानंतर पुढील तीन सेट ७-६, ६-१, ६-१ असे जिंकत सामना आपल्या नावावर केला. झ्वेरेवने ही लढत तीन तास व ४२ मिनिटांमध्ये जिंकली.

स्पेनचा युवा स्टार कार्लोस अल्काराझ याने २६ वा मानांकित युनायटेड किंगडमच्या डॅनियल इवांस याच्यावर चार सेटमध्ये विजय साकारत जेतेपद राखण्यासाठी पाऊल टाकले.

सबलेंका, पेगुलाची महिला विभागात आगेकूच

महिला विभागात मानांकित खेळाडूंनी आगेकूच केली. दुसरी मानांकित एरीना सबलेंका व तिसरी मानांकित जेसिका पेगुला यांनी प्रतिस्पर्ध्यांना हरवण्याची किमया करून दाखवली. पेगुला हिने एलिना स्वितोलिना हिच्यावर ६-४, ४-६, ६-२ अशी मात केली.

सबलेंका हिने क्लॅरा बुरेल हिच्यावर ६-१, ६-१ असा सहज विजय नोंदवला. या दोघींसह पाचवी मानांकित ओन्स जॅब्यूएर, १७ वी मानांकित मेडिसन किज यांनीही प्रतिस्पर्ध्यांना हरवत कूच केली.