नवी दिल्ली : ऑलिंपिक पदकविजेता बजरंग पुनिया आणि जागतिक विजेती विनेश फोघाट यांना आगामी आशिया क्रीडा स्पर्धेत चाचणीशिवाय थेट प्रवेश देण्याचा निर्णय भारतीय कुस्ती फेडरेशनच्या हंगामी समितीने घेतला. राष्ट्रीय मुख्य प्रशिक्षकांच्या संमतीशिवाय हा निर्णय घेतल्यामुळे अनेकांनी भुवया उंचावल्या आहेत.

भारतीय ऑलिंपिक असोशिएशनने (आयओए) जाहीर केलेल्या पत्रकात पुरुष फ्रिस्टाईल ६५ किलो आणि महिला ५३ किलो या गटात अगोदरच कुस्तीपटूंची निवड केली आहे. उर्वरित सहा गटांसाठी आता निवड चाचणी होईल, असे स्पष्ट करण्यात आले होते.

पुरुष ६५ किलो हा गट बजरंग पुनिया आणि महिलांचा ५३ किलो गट विनेशचा आहे. आयओएच्या पत्रकात बजरंग आणि विनेश यांच्या नावांचा उल्लेख नसला तरी या दोघांना चाचणीतून वगळण्यात आल्याचे हंगामी समितीतील सदस्य अशोक गर्ग यांनी सांगितले.

हांगझाऊ येथे २३ सप्टेंबरपासून सुरू होणाऱ्या आशिया क्रीडा स्पर्धेसाठी कुस्तीचा संघ निवडण्याकरिता निवड चाचणी घेण्याचा निर्णय भारतीय ऑलिंपिक असोसिएशनने चार दिवसांपूर्वीच घेतला होता. ही निवड चाचणी २२ आणि २३ जुलै रोजी दिल्लीत होणार आहे.

बजरंग आणि विनेशसह सहा कुस्तीपटूंनी ब्रृजभूषण सिंग यांच्याविरोधात जंतरमंतर येथे मोठे आंदोलन केले होते. बजरंग आणि विनेश सध्या बुदापेस्ट (हंगेरी) येथे सराव करत आहेत. बृजभूषण यांच्याविरोधातील कुस्तीपटूंची ही लढाई न्यायालयात सुरू आहे.