Asian Para Games : हांगझू येथे सुरू असलेल्या चौथ्या एशियन पॅरा गेम्समध्ये भारताची शूटर अवनी लेखराने R2 10 मीटर एअर रायफ्ल स्टँडिंग SH1 प्रकारात सुवर्ण पदक पटकावलं. अवनी ही केंद्र सरकारच्या टॉप स्कीमची खेळाडू आहे. भारताचे ही एशियन पॅरा शूटिंगमधील दुसरे पदक आहे.

अवनीने एकूण 249.6 गुण मिळवत एशियन पॅरा गेम्समध्ये नवे रेकॉर्ड प्रस्थापित केलं. अवनीच्या आधी शूटिंगमध्ये रूद्रांशने मिश्र 50 मीटर पिस्टल SH1प्रकारात भारताला कांस्य पदक पटाकावून दिलं होतं.

भारताने आज एशियन पॅरा गेम्समध्ये उंच उडीत दमदार कामगिरी केली. निशाद कुमारने पुरूष उंच उडी T47 प्रकारात सुवर्ण पदक पटकावलं. त्याने 2.02 मीटर उंच उडी मारत एशियन पॅरा गेम्समध्ये रेकॉर्ड ब्रेक कामगिरी केली. तर राम पालने देखील उंच उडी T47 प्रकारात रौप्य पदकाची कमाई केली.

याचबरोबर भारताने उंच उडी आणि क्लब थ्रोमध्ये मोठी कामगिरी केली आहे. भारतीय पुरूष संघाने तीनही पदके आपल्या नावावर केली आहे. पुरूष क्लब थ्रो F5 प्रकारात प्रणव सूरमाने सुवर्ण पदक तर धरमबीर आणि अमित कुमार हे अनुक्रमे रौप्य आणि कांस्य पदक पटकावले.

शैलेश कुमारने एशियन पॅरा गेम्समध्ये पुरूष उंच उडीत 1.82 मीटर उंच उडी मारत रेकॉर्ड प्रस्थापित केले. त्याने T63 प्रकारात सुवर्ण पदक पटकावले. तर मरियप्पन थांगावेलूने 1.80 मीटर उंच उडी मारत रौप्य पदक तर गोविंदभाई पाधियारने 178 मीटर उंच उडी मारत कांस्य पदकावर कब्जा केला.
(Sports Latest News)