नवी दिल्ली- स्पर्धेच्या पहिल्या दिवशी ग्रीको रोमन प्रकारात एक सुवर्ण, दोन रौप्य, एक ब्रॉंझ अशी चार पदकांची कमाई करणाऱ्या भारताला दुसऱ्या दिवशी याच प्रकारातील वीरेश कुंडूच्या एकमात्र ब्रॉंझपदकावर समाधान मानानवे लागले. स्पर्धेतील दुसऱ्या दिवशी बुधवारी अन्य वजनी गात भारताला अपयशाचाच चेहरा बघावा लागला. ग्रीको रोमन प्रकारात इराणने 225 गुणासंह विजेतेपद पटकावले. कझाकिस्तान 147 गुणांसह दुसरे आले. भारतालाच चौथ्या स्थानावर समाधान मानावे लागले. 

येथील खाशाबा जाधव कुस्ती संकुलात सुरू असलेल्या या स्पर्धेत दुसऱ्या दिवशी एकेक मल्ल पराभूत होत असताना 97 किलो वजनी गात वीरेश कुंडू याने भारताला ब्रॉंझपदकाचे समाधान दिले. ब्रॉंझपदकाच्या लढतीत त्याने जेऑन क्वॉन याचा 14-5 असा गुणांवर पराभव केला. कोरियन जेऑन याची सुरवात भन्नाट होती. पहिल्या 30 सेकंदातच जेऑनने ढाक डावावर 2 गुणांची कमाई केली. मात्र वीरेशने नंतर आक्रमक पवित्रा घेत त्याच्यावर ताबा मिळवून दोन गुणांची कमाई केली. लगोलग भारदंजा डावावर त्याने दोन वेळा दोन गुण मिळवून पहिल्या फेरी अखेरीस 2-6 अशी आघाडी घेतली. दुसऱ्या फेरीत जेऑनने पुन्हा ढाक डाव टाकण्याचा प्रयत्न वीरेशने असफल ठरवून 2 गुण मिळविले. त्यानंतरही हीच आक्रमकता कायम ठेवत त्याने भारंदजा डावाचा सुरेख वार करून झटपट गुणांची कमाई केली. या दरम्यान लढतीवरील वीरेशचे नियंत्रण सुटल्यामुळे पंचांनी जेऑनला एक गुण दिला. लढतीत 10-3 असे असताना जेऑनने ताबा मिळवत दोन गुणांची कमाई केली. मात्र अखेरच्या टप्प्यात वीरेशने थ्रो मारून चार गुणांची कमाई करत तांत्रिक गुणाधिक्‍यावर विजय मिळविला. 

सचिन राणा याने 60 किलो वजनी गटात चीनच्या जेमिन रेहेती याच्यावर 3-1 असा विजय मिळवून झकास सुरवात केली. पण दुसऱ्या फेरीत त्याला उझबेकिस्तानच्या तुराबेक याच्याडून 7-10 असा पराभव पत्करावा लागला. मलकित हुडाने 67 किलो वजनी गटात इराणच्या अली महंमद याच्यावर 5-0 असा विजय मिळवून चमकदार सुरवात केली. दुसऱ्या फेरीत त्याने तुर्कमेनिस्तानच्या इझिमोह याला 2-0 असे हरवले. मात्र उपांत्य फेरीत त्याला किर्गिझस्तानच्या खालमुरत याच्याकडून 0-9 असा पराभव पत्करावा लागला. 

स्पर्धेतील आणखी एका 72 किलो वजनी गटात कुलदीप मलिकला दुसऱ्याच फेरीत इराणच्या अमिनकडून 8-0 असा पराभव पत्करावा लागला. अमिनने अंतिम फेरी गाठल्याने त्याला रिपेचेजमध्ये खेळण्याची संधी मिळाली. पण तेथे तो उझबेकिस्तानच्या अलिजॉनकडून 8-0 असा पराभूत झाला. संजितला 82 किलो वजनी गटात पहिल्याच फेरीत उझबेकिस्तानच्या मुझाफेरबेककडून 8-0 अशा पराभवासा सामोरे जावे लागले.