Australia v Pakistan Boxing Day Test : यजमान ऑस्ट्रेलियन क्रिकेट संघाला पहिल्या दिवसअखेरीस सुस्थितीत असतानाही पहिल्या डावात मोठी धावसंख्या उभारता आली नाही. त्यांचा डाव ३१८ धावांवरच आटोपला. त्यानंतर अब्दुल्ला शफीक व शान मसूद यांनी अर्धशतकी खेळी करीत पाकला भक्कम सुरुवात करून दिली; पण पॅट कमिन्स व जॉश हॅझलवूड या वेगवान गोलंदाजांनी पाकच्या फलंदाजांवर वर्चस्व गाजवत त्यांची अवस्था दुसऱ्या दिवसअखेरीस ६ बाद १९४ धावा अशी केली. आता पाकिस्तानचा संघ १२४ धावांनी पिछाडीवर आहे.

ऑस्ट्रेलियाने ३ बाद १८७ या धावसंख्येवरून बुधवारी पुढे खेळायला सुरुवात केली. मार्नस लाबुशेन याने ६३ धावांची खेळी केली. तसेच मिचेल मार्शने ४१ धावा केल्या; पण दोघांनाही मोठी खेळी करता आली नाही. पाकिस्तानकडून आमेर जमाल याने ६४ धावांच्या मोबदल्यात मार्नस लाबुशेन, स्टीवन स्मिथ व पॅट कमिन्स यांना बाद केले. शाहीन शाह आफ्रिदी, मिर हामझा व हसन अली यांनी प्रत्येकी दोन फलंदाज बाद केले.

अर्धशतकी खेळींनंतर निराशा

अब्दुल्ला शफीक व इमाम उल हक या सलामीवीरांनी ३४ धावांची भागीदारी करताना आश्‍वासक सुरुवात करून दिली; पण नॅथन लायनच्या गोलंदाजीवर इमाम १० धावांवर बाद झाला. त्यानंतर अब्दुल्ला व शान मसूद यांनी अनुक्रमे ६२ धावांची व ५४ धावांची खेळी साकारताना पाकिस्तानसाठी मोलाची कामगिरी बजावली.

पॅट कमिन्सने अब्दुल्लाला बाद करीत पाकला दुसरा धक्का दिला. यानंतर मात्र पाकच्या फलंदाजांना चमक दाखवता आली नाही. २ बाद १२४ या धावसंख्येवरून पाकची अवस्था ६ बाद १७० धावा अशी झाली. अब्दुल्लाने आपल्या खेळीत पाच चौकार मारले. मसूद याने ३ चौकार व एक षटकारासह ५४ धावांची खेळी केली. लायनच्या गोलंदाजीवर तो बाद झाला. बाबर आझम, सौद शकील, आगा सलमान अपयशी ठरले.