South Africa vs India 2nd Test Avesh Khan | भारतीय क्रिकेट संघ सध्या दक्षिण आफ्रिकेच्या दौऱ्यावर आहे, जिथे टीम इंडिया टी-20 आणि एकदिवसीय मालिका संपवून कसोटी मालिका खेळत आहे.

या मालिकेतील पहिला कसोटी सामना सेंच्युरियन मैदानावर खेळला गेला, ज्यामध्ये दक्षिण आफ्रिकेने भारताचा एक डाव आणि 32 धावांनी पराभव केला. आता टीम इंडियाला मालिका गमवायची नसेल तर त्यांना केपटाऊनमध्ये होणारा दुसरा कसोटी सामना कोणत्याही किंमतीत जिंकावा लागेल.

पण त्याआधी मोठी बातमी येत आहे, सेंच्युरियनमधील पराभवानंतर भारतीय संघात वेगवान गोलंदाज आवेश खानचा समावेश करण्यात आला आहे.

दक्षिण आफ्रिकेविरुद्धच्या पहिल्या कसोटीतील लाजिरवाण्या पराभवानंतर भारतीय क्रिकेट नियामक मंडळाने मोहम्मद शमीच्या जागी आवेश खानची निवड केली आहे. आवेश खान आधीच टीम इंडियासोबत आहे. तो दक्षिण आफ्रिकेविरुद्ध एकदिवसीय मालिका खेळला.

वनडे मालिकेतील पहिल्या सामन्यात आवेश खानने मॅच विनरची भूमिका बजावली होती. त्याने 27 धावांत चार विकेट घेतल्यामुळे यजमान संघ 27.3 षटकांत 116 धावांवर गारद झाला. भारताने अवघ्या 17 षटकांत हे लक्ष्य गाठले. त्याने अद्याप कसोटीत पदार्पण केले नाही. भारतासाठी 8 एकदिवसीय सामन्यात 9 आणि 19 टी-20 सामन्यात 18 बळी घेतले आहेत.

दक्षिण आफ्रिका दौऱ्यासाठी संघाची घोषणा करताना बीसीसीआयने शमीला कसोटी संघात स्थान दिले होते. मात्र, मोहम्मद शमीचे कसोटी मालिकेत खेळणे त्याच्या फिटनेसवर अवलंबून असल्याचेही निवेदनात म्हटले होते.

बीसीसीआयच्या वैद्यकीय पथकाने शमीला फिटनेस प्रमाणपत्र दिले नाही, त्यामुळे तो या मालिकेतून बाहेर पडला. सेंच्युरियन कसोटीतील पराभवानंतर अनेक दिग्गजांनी भारतीय संघाला शमीची उणीव भासल्याचे वक्तव्य केले होते.

दुसऱ्या कसोटीसाठी भारतीय संघ - रोहित शर्मा (कर्णधार), शुभमन गिल, यशस्वी जैस्वाल, विराट कोहली, श्रेयस अय्यर, केएल राहुल (यष्टीरक्षक), आर अश्विन, रवींद्र जडेजा, शार्दुल ठाकूर, मोहम्मद सिराज, मुकेश कुमार, जसप्रीत बुमराह (उपकर्णधार), प्रसिध्द कृष्णा, केएस भरत (यष्टीरक्षक), अभिमन्यू ईश्वरन, आवेश खान.