भारत विरुद्ध दक्षिण आफ्रिका (INDvsSA) यांच्यात पहिला टी २० सामना अरुण जेटली स्टेडियमवर खेळवण्यात आला. या सामन्यात दक्षिण अफ्रिकेने भारतावर ७ विकेट्सनी विजय मिळवला. मात्र, पहिल्याच सामन्यात भारताचा खतरनाक यॉर्कर पाहायला मिळाला. आवेश खानच्या खतरनाक यॉर्करने डुसेनच्या बॅटचे दोन तुकडे केले आहेत. ज्याच्या व्हिडीओ सध्या व्हायरल होताना दिसत आहे.

दक्षिण आफ्रिकेच्या डावादरम्यान १४ व्या षटकादरम्यान भारताकडून वेगवान गोलंदाज आवेश हे षटक टाकण्यासाठी आला होता. तर दक्षिण आफ्रिकेकडून डूसेन स्ट्राईकवर होता. या षटकातील तिसरा चेंडू आवेशने यॉर्कर टाकला, ज्यावर डूसेनने कव्हरच्या दिशेला फटका मारला. आवेशने फेकलाल हा यॉर्कर इतका भेदक होता की, डूसेनची बॅट मधून चिरली.

या क्षणाचा व्हिडीओ सध्या सोशल मीडियावर व्हायरल होताना दिसत आहे. यावेळी डूसेन २२ धावांवर खेळत होता. बॅटचे २ तुकडे झाल्याने नवीन बॅट मागवण्यात आली.

डूसेन ४६ चेंडूत नाबाद ७५ धावा करत संघाच्या विजयाचा शिल्पकार ठरला. डूसेनबरोबरच डेविड मिलरनेही संघासाठी महत्त्वपूर्ण योगदान दिले. भारताविरुद्ध भारतात टी२० क्रिकेटमध्ये दक्षिण आफ्रिकी फलंदाजांनी केलेली सर्वोच्च भागीदारी ठरली आहे. या अभेद्य भागीदारीच्या जोरावरच पाहुण्या दक्षिण आफ्रिकेने ७ विकेट्सने हा सामना जिंकला आहे.

भारताने प्रथम फलंदाजी करताना निर्धारित २० षटकात ४ विकेट्सच्या नुकसानावर २११ धावा केल्या होत्या. प्रत्युत्तरात हे आवाहन आफ्रिकेने 5 बॉलआधी 3 विकेट्सच्या मोबदल्यात पूर्ण केलं. या विजयासह आफ्रिकेने 5 सामन्यांच्या मालिकेत 1-0 अशी आघाडी घेतली.