Rohit Sharma on R Ashwin : टीम इंडियाने रविवारी कोलंबोमध्ये झालेल्या आशिया कप फायनलमध्ये श्रीलंकेचा 10 गडी राखून पराभव करून आशिया कपचे विजेतेपद पटकावले. वेगवान गोलंदाज मोहम्मद सिराजच्या खतरनाक स्पेलनंतर शुभमन गिल आणि इशान किशन यांच्या अर्धशतकी भागीदारीच्या जोरावर भारताने पाच वर्षांनंतर आशिया कप जिंकला. दरम्यान भारतीय कर्णधार रोहित शर्माने अनुभवी फिरकी गोलंदाज रविचंद्रन अश्विनबाबत मोठे वक्तव्य केले.

आशिया कप विजेतेपद पटकावल्यानंतर पत्रकार परिषदेत कर्णधार रोहित म्हणाला की, अश्विन एक फिरकीपटू अष्टपैलू म्हणूनही या योजनेत आहे. मी त्याच्याशी फोनवर बोलत आहे. अक्षर शेवटच्या क्षणी दूखापत झाली होती. त्यावेळी वॉशिंग्टन उपलब्ध होता, म्हणून त्याला बोलाण्यात आले. आशियाई गेमच्या सराव शिबिराचा भाग असल्याने सुंदर हा सामना खेळण्यासाठी लगेचच फिट झाला. मी खेळाडूंच्या भूमिकेबाबत अगदी स्पष्ट आहे.

अश्विनने शेवटचा वनडे सामना जानेवारी 2022 मध्ये दक्षिण आफ्रिकेविरुद्ध खेळला होता. विजेतेपद जिंकल्यानंतर पत्रकार परिषदेत रोहितने स्टार अष्टपैलू अक्षर पटेल आणि फलंदाज श्रेयस अय्यर यांच्या आरोग्य आणि फिटनेसबद्दल सांगितले. रोहित म्हणाला की, डावखुरा फिरकीपटू अक्षर पटेल पुढील आठवड्यात ऑस्ट्रेलियाविरुद्धच्या पहिल्या दोन एकदिवसीय सामन्यांना मुकण्याची शक्यता आहे, तर मधल्या फळीतील फलंदाज श्रेयस अय्यर 99 टक्के मॅच फिट आहे.