Baba Indrajith Vijay hazare trophy : क्रिकेटचा सामना म्हटलं की एक संघ जिंकणार एक संघ हरणार. जिंकलेल्या संघाची चर्चा होते तर हरलेल्या संघाची समिक्षा केली जाते. मात्र काही सामने असे असतात जिथे जिंकणाऱ्यांपेक्षा पराभव झालेल्यांचीच चर्चा जास्त होते.

विजय हजारे ट्रॉफीमधील हरियाणा विरूद्ध तमिळनाडू यांच्यातील हा सामना देखील असाच आहे. तमिळनाडू जरी हरला असला तरी संघातील झुंजार खेळाडू बाबा इंद्रजीतमुळं हा सामना कायम चर्चेत राहील.

हरियाणाने तमिळनाडूचा 63 धावांनी पराभव करत पहिल्यांदाच विजय हजारे ट्रॉफीची फायनल गाठली. जरी सामना हरियाणाने जिंकला असला तरी बाबा इंद्रजीतच्या त्या 64 धावा सर्वांच्याच मनात घर करून गेल्या. सामन्यादरम्यान, बाबा इंद्रजीतचा ओठ फाटला.

मात्र त्यानंतरही त्याने सामना न सोडता ओठ बँड एड पट्टीने बांधून ठेवला अन् फलंदाजी केली. बाबाचा हा फोटो पाहून अनिल कुंबळेची आठवण झाली. त्याने देखील 2002 च्या अँटिगा कसोटीत जबडा तुटला असतानाही जबडा पट्टीने बांधून गोलंदाजी केली होती.

बाबा इंद्रजीत ज्यावेळी फलंदाजी करण्यासाठी आला त्यावेळी तमिळनाडूची अवस्था 2 बाद 54 धावा अशी झाली होती. त्यानंतर इंद्रजीतने संघाला 192 धावांपर्यंत पोहचवलं. अखेर सातव्या विकेटच्या रूपात बाबा इंद्रजीत बाद झाला अन् तमिळनाडूचा पराभव निश्चित झाला.

हरियाणाने पहिल्यादा फलंदाजी करताना 7 बाद 293 धावा केल्या होत्या. त्याच्या प्रत्युत्तरात खेळणाऱ्या तमिळनाडूचा संपूर्ण संघ 230 धावात बाद झाला.

(Sports Latest News)