Babar Azam Pakistan Vs England 1st Test : पाकिस्तानने इंग्लंडविरूद्धची कसोटी 75 धावांनी गमावली. तीन सामन्यांच्या मालिकेत इंग्लंडने 1 - 0 अशी आघाडी घेतली. इंग्लंडने कसोटीच्या पहिल्याच दिवशी 506 धावा केल्यानंतर रावळपिंडीच्या खेळपट्टीवर सपाटून टीका करण्यात येत आहे. आता पाकिस्तानचा कर्णधार बाबर आझमने देखील पीसीबीला चिमटा काढत विकेटवर अप्रत्यक्षरित्या टीका केली. पहिल्या कसोटीत पाच दिवसात दोन्ही संघांनी तब्बल 1768 धावा केल्या.

दरम्यान, बाबर आझमने पराभवानंतर सामना कुठे गमवाला याचे कारण पत्रकार परिषदेत सांगितले. ज्या पद्धतीने आम्ही रणनिती आखली होती त्या प्रकारे खेळपट्टी तयार करण्यात आली नव्हती. त्यामुळे पाकिस्तानची रणनिती फेल गेली असे त्याने सांगितले.

पत्रकारांशी बोलताना पराभवाबद्दल बाबर म्हणाला की, 'आमच्याकडे खेळपट्टीबाबत चांगली माहिती होती. आम्ही जी आखणी केली होती. ज्या गोष्टी होतील अशी अपेक्षा केली होती. तशी खेळपट्टी आम्हाला मिळाली नाही. दुर्दैवाने आमचे प्लॅन्स योग्यरित्या मैदानावर उतरलेच नाहीत. आम्हाला थोडी फिरकीला साथ देणारी खेळपट्टी हवी होती. तो आमचा प्लॅन होता. मात्र दुर्दैवाने हवामानामुळे किंवा तयारी करण्यातील चुकीमुळे हवीतशी खेळपट्टी तयार झाली नाही.'

इंग्लंडने पहिल्या डावात 657 धावा केल्या. तर दुसरा डाव 7 बाद 264 धावांवर घोषित केला. दरम्यान, पाकिस्तानने देखील पहिल्या डावात दमदार फंलदाजी केली. त्यांनी 579 धावा केल्या. मात्र इंग्लंडने विजयासाठी 342 धावांचे आव्हान ठेवल्यानंतर त्यांचा दुसरा डाव 268 धावांमध्ये संपुष्टात आला. पहिल्या कसोटीत तब्बल 7 फलंदाजांनी शतक ठोकले.

हेही वाचा : First Paralympic Winner : मुरलीकांत पेटकर सांगतायत अपंग खेळाडूंसमोरील आव्हाने