ऑर्लिन्स (फ्रान्स) - भारताचा २१ वर्षीय बॅडमिंटनपटू प्रियांशू राजवत याने रविवारी संस्मरणीय कामगिरी केली. त्याने अंतिम फेरीच्या लढतीत डेन्मार्कच्या मॅग्नस जोहानसन याला २१-१५, १९-२१, २१-१६ असे पराभूत करीत ऑर्लिन्स बॅडमिंटन मास्टर्स स्पर्धा जिंकण्याचा पराक्रम केला. जागतिक टूअर ३०० मालिका त्याने पहिल्यांदाच जिंकली हे विशेष.

भारताच्या बॅडमिंटन संघाने २०२२ मध्ये थॉमस करंडक जिंकला होता. या ऐतिहासिक विजय संपादन करणाऱ्या भारताच्या संघात प्रियांशू याचाही समावेश होता. मध्य प्रदेशमध्ये जन्म झालेल्या प्रियांशू व मॅग्नस यांच्यामधील लढतीच्या पहिल्या गेममध्ये ६-६ अशी बरोबरी होती, पण त्यानंतर प्रियांशू याने आपला खेळ उंचावला आणि १८-११ अशी आघाडी घेतली. पहिला गेम प्रियांशू जिंकणार असे वाटत असतानाच त्याच्याकडून चुका झाल्या. त्यामुळे प्रियांशूला सलग चार गुण मिळाले. मॅग्नसनेही १८-१५ अशी आघाडी कमी केली, पण प्रियांशू याने त्यानंतर झोकात पुनरागमन केले व २१-१५ असा पहिला गेम जिंकला.

दुसऱ्या गेमच्या ब्रेकला मॅग्नस याच्याकडे ११-८ अशी आघाडी होती. त्यानंतर दोन खेळाडूंमध्ये १४-१४ असा स्कोअर झाला. प्रियांशूने गुण मिळवत पहिल्यांदाच या गेममध्ये १५-१४ अशी आघाडी मिळवली. या गेममध्ये प्रियांशूकडून झालेल्या चुकांचा मॅग्नस याला फायदा झाला. मॅग्नस याने २१-१९ असा गेम जिंकत लढतीत १-१ अशी बरोबरी साधली.

तिसऱ्या गेममध्ये दोन्ही खेळाडूंमध्ये कडवा संघर्ष पाहायला मिळाला. दोन्ही खेळाडूंमध्ये ९-९ अशी बरोबरी होती, पण त्यानंतर प्रियांशूने २ गुण घेत ११-९ अशी आघाडी मिळवली. यानंतर भारताच्या पठ्ठ्याने मागे वळून बघितले नाही. अखेर २१-१६ असा अखेरचा गेम जिंकत मालिकाही आपल्या नावावर केली.

ऑर्लिन्स स्पर्धा मी पहिल्यांदाच जिंकली आहे. त्यामुळे साहजिकच माझा आनंद गगनात मावेनासा झाला आहे. भारत देशातील बॅडमिंटनप्रेमींचाही मला नेहमीच सपोर्ट राहिला आहे. त्यांचाही आभारी आहे.

- प्रियांशू राजवत, विजेता, ऑर्लिन्स मास्टर्स बॅडमिंटन स्पर्धा