नवी दिल्ली : राष्ट्रीय उत्तेजकविरोधी संघटनेकडून (नाडा) काही दिवसांपूर्वी निलंबनाची शिक्षा सुनावण्यात आल्यानंतर आता भारताचा अनुभवी कुस्तीपटू बजरंग पुनिया याचा पाय आणखीनच खोलात गेला आहे. जागतिक कुस्ती संघटनेकडूनही त्याला निलंबित केले असून या वर्षअखेरीसपर्यंत त्याच्यावरील निलंबन कायम राहणार आहे. यामुळे आता पॅरिस ऑलिंपिकमध्ये प्रवेश करण्याच्या त्याच्या आशांना सुरुंग लागला आहे.

उत्तेजक नमुना चाचणीला नकार दिल्यामुळे नाडाकडून बजरंग पुनियाच्या निलंबनाच्या शिक्षेचा कठोर निर्णय घेण्यात आला. दरम्यान, बजरंगवरील निलंबनाचा निर्णय घेताना आम्हाला अंधारात ठेवण्यात आल्याचे भारतीय कुस्ती संघटनेकडून स्पष्ट करण्यात आले होते.

याप्रसंगी या प्रकरणाबाबत जागतिक उत्तेजकविरोधी संघटनेला (वाडा) पत्र लिहिणार असल्याचेही त्यांच्याकडून सांगण्यात आले. आशियाई ऑलिंपिक पात्रता फेरीसाठी सोनीपत येथे १० मार्च रोजी निवड चाचणी घेण्यात आली होती. या चाचणीत पराभूत झाल्यानंतर बजरंग तडकाफडकी तेथून निघून गेला.

नाडाला उत्तेजक नमुना चाचणीही त्याच्याकडून देण्यात आली नाही. त्यामुळे नाडाकडून २३ एप्रिलला त्याला निलंबित करण्यात आले आहे. या प्रकरणावर उत्तर देण्यासाठी बजरंगला काही दिवसांचा अवधी देण्यात आला होता. बजरंग याच्या वकिलाकडून नाडाला उत्तर देण्यात आले आहे.

जागतिक कुस्ती संघटनेकडून थेट संवाद नाही

जागतिक कुस्ती संघटनेकडून निलंबनाच्या शिक्षेबद्दल थेट बजरंग पुनियाशी संपर्क साधण्यात आला नाही. त्यांच्या सिस्टीममध्ये बजरंगच्या निलंबनाबद्दल प्रसिद्ध करण्यात आले आहे. नाडाकडून त्याला निलंबित करण्यात आल्यामुळे आमच्याकडूनही निलंबनाचा निर्णय घेण्यात आल्याचे जागतिक कुस्ती संघटनेकडून स्पष्ट करण्यात आले आहे.