नवी दिल्ली : सर्वोच्च न्यायालयाकडून कुलिंग ऑफ पिरियड या नियमात सूट देण्यात आल्यानंतर आता बीसीसीआयच्या निवडणूक प्रकियेला वेग आला आहे. येत्या १८ ऑक्टोबरला बीसीसीआयची निवडणूक होणार आहे; पण त्याआधीच्या सर्व प्रकियांना सुरुवात झाली आहे.

बीसीसीआयकडून निवडणूक अधिकारी म्हणून ए. के. ज्योती यांची निवड करण्यात आली आहे. प्रत्येक संलग्न संघटनांना आपल्या प्रतिनिधीचे नाव देण्यास ४ ऑक्टोबरपर्यंतचा अवधी दिला आहे. ५ ऑक्टोबरपासून उमेदवारी अर्ज भरण्यास सुरुवात होणार आहे. त्यानंतर १३ ऑक्टोबरला अंतिम उमेदवारांची यादी जाहीर होणार आहे. अर्ज मागे घेण्याची अंतिम तारीख १४ ऑक्टोबर असणार आहे. अध्यक्ष, उपाध्यक्ष, सचिव, सहसचिव व खजिनदार या पाच प्रमुख पदांसाठी बीसीसीआयची निवडणूक होणार आहे. १८ ऑक्टोबरला मतदान होणार असून त्याच दिवशी निकालही लागणार आहे. अशा प्रकारचे वृत्त प्रसारमाध्यमांतून समोर आले आहे.