आयपीएलपूर्वी मुंबई इंडियन्स संघाला मोठा धक्का बसण्याची शक्यता वर्तवण्यात येत आहे. स्टार वेगवान गोलंदाज संघातून बाहेर पडणार असल्याची माहिती समोर आली आहे.

गेल्या काही दिवसांपासून म्हणजेच सप्टेंबर २०२२ पासून जसप्रीत बुमराह मैदानाबाहेर आहे. त्याच्या कंबरेच्या दुखापतीमुळे तो अंतरराष्ट्रीय क्रिकट खेळत नसल्याचे पाहायला मिळत आहे. यापूर्वी तो बॉर्डर गावसकर ट्रॉफी पर्यंत त्याच्या दुखापतीत सुधारणा होईल असं वाटत होत पण पदरी निराशा पडली. त्यानंतर तो आयपीएलपर्यंत ठिक होईल असं वाटत असताना नवी अपडेट समोर आली आहे.

मीडिया रिपोर्ट्सनुसार, जसप्रीत बुमराहला आयपीएल 2023 पर्यंत तंदुरुस्त राहणे कठीण आहे. त्याचवेळी, जूनमध्ये खेळल्या जाणाऱ्या आयसीसी वर्ल्ड टेस्ट चॅम्पियनशिप 2023 च्या फायनलपर्यंतही तो तंदुरुस्त नसल्याच्या बातम्या आहेत. जी भारतीय संघ आणि मुंबई इंडियन्ससाठी चिंतेची बाब आहे. त्याची दुखापत गंभीर आहे.

मिळालेल्या माहितीनुसार, भारतीय व्यवस्थापन आता ऑक्टोबर-नोव्हेंबरमध्ये भारतात होणाऱ्या एकदिवसीय विश्वचषकापूर्वी जसप्रीत बुमराहला तंदुरुस्त करण्याचा विचार करत आहे. कारण बुमराह हा भारताच्या प्रमुख खेळाडूंपैकी एक आहे. भारताला आगामी एकदिवसीय विश्वचषक जिंकायचा असेल, तर कर्णधार रोहित शर्मा आणि विराट कोहलीच्या संघात बुमराहची उपस्थिती तितकीच महत्त्वाची आहे.

बुमराहने आत्तापर्यंत भारतासाठी 30 कसोटी, 72 एकदिवसीय आणि 60 टी-20 सामने खेळले आहेत. ज्यामध्ये जसप्रीतने अनुक्रमे 128, 121 आणि 70 विकेट घेतल्या आहेत. दुसरीकडे, जसप्रीत बुमराहने त्याच्या आयपीएल कारकिर्दीत मुंबई इंडियन्सकडून 120 सामन्यांमध्ये 145 विकेट घेतल्या आहेत.