न्यूयॉर्क : अमेरिकन ओपन या टेनिस विश्‍वातील या वर्षातील अखेरच्या ग्रँडस्लॅम स्पर्धेला उद्यापासून (२९ ऑगस्‍ट) सुरुवात होत आहे. या वेळी महिला एकेरीच्या लढतीत सेरेना विल्यम्सच्या कामगिरीकडे तमाम टेनिसप्रेमींच्या नजरा खिळल्या आहेत. ही स्पर्धा तिच्या कारकीर्दीतील अखेरची असेल, असे तिने संकेत दिले आहेत. त्यामुळे अमेरिकन ओपन ग्रँडस्लॅम जिंकून सेरेना मार्गरेट कोर्टच्या सर्वाधिक २४ ग्रँडस्लॅम जेतेपदाची बरोबरी करते का, हे पाहणे या वेळी रंजक ठरणार आहे.

सेरेनाने अखेरचे ग्रँडस्लॅम जेतेपद २०१७ मध्ये पटकावले होते. तिने त्यावर्षी ऑस्ट्रेलियन ओपन स्पर्धा जिंकण्याची किमया साधली होती. त्यानंतर मात्र मागील ५ वर्षांमध्ये तिला एकाही ग्रँडस्लॅमच्या जेतेपदाला गवसणी घालता आलेली नाही. गेल्या काही काळामध्ये कुटुंब व दुखापत यामुळेही तिला सातत्याने टेनिस कोर्टपासून दूर राहावे लागत आहे. तसेच तिने आता व्यवसायातही पाऊल ठेवले आहे. आपल्या कुटुंबाला तसेच व्यवसायाला वेळ देण्यासाठी सेरेना आंतरराष्ट्रीय टेनिसला अलविदा करणार आहे.

तीन ग्रँडस्लॅम जिंकण्याची संधी

स्पेनचा महान टेनिसपटू राफेल नदाल या वर्षी जबरदस्त फॉर्ममध्ये आहे. या पठ्ठ्याने ऑस्ट्रेलियन ओपन व फ्रेंच ओपन या दोन ग्रँडस्लॅमची जेतेपदे पटकाविली. त्यानंतर विम्बल्डन स्पर्धेत दुखापतीमुळे निक किर्गीओसविरुद्धच्या उपांत्य लढतीत तो खेळू शकला नाही. अखेर त्याने स्पर्धेमधून माघार घेतली. नदालने २०१० मध्ये तीन ग्रँडस्लॅम स्पर्धा जिंकण्याचा पराक्रम केला होता. २०२२ मध्येही त्याला या कामगिरीची पुनरावृत्ती करण्याची संधी असेल.