टोकियो : लंडन ऑलिम्पिकमध्ये कांस्य पदक पटकावणाऱ्या सायना नेहवालने बॅडमिंटन जागतिक अजिंक्यपद (BWF World Championships) स्पर्धेत दमदार सुरूवात केली. तिने हाँग काँगच्या चेऊंग ननाग यी चा सरळ दोन गेममध्ये पराभव केला. सायनाने 38 मिनिटात हाँग काँगच्या यीचे पॅक अप केले. तिने सामना 21 - 19, 21 - 09 असा जिंकला.

32 वर्षाच्या सायनाने यापूर्वी जागतिक अजिंक्यपद स्पर्धेत रौप्या आणि कांस्य पदक जिंकले आहे. तिने यंदाच्या बॅडमिंटन जागतिक अजिंक्यपद स्पर्धेत प्री क्वार्टरफायनलमध्ये प्रवेश केला. दुसऱ्या फेरीतील सायना विरूद्ध खेळणाऱ्या नोझोमी ओकुहाराने दुखापतीमुळे स्पर्धेतूनच माघार घेतली. त्यामुळे बाय मिळालेल्या सायनाचा प्री क्वार्टरफायनलचा मार्ग मोकळा झाला.

दरम्यान, महिला दुहेरीत ट्रीसा जॉली आणि गायत्री गोपीचंद यांनी देखील विजयी सुरूवात केली. भारताच्या या महिला जोडीने मलेशियाच्या यीन युआन लोव्ह आणि वालेरी सिओव्हचे कडवे आव्हान 21 - 11 21 -13 असे परतवून लावले. मात्र भारताला मिश्र दुहेरीत पराभवाचा सामना करावा लागला. व्यंकट गुरूअन प्रसाद आणि जुही देवांगन यांचा इंग्लंडच्या ग्रेगोरी मारिस आणि जेनी मूरे या जोडीने 10 - 21, 21 - 23 असा पराभव केला.