बाली: ऑलिंपिकमध्ये देशासाछी दोन पदकांची कमाई करणाऱ्या सिंधूला ‘बीडब्लूएफ’ जागतिक बॅडमिंटन स्पर्धेच्या अंतिम फेरीत पराभवाचा सामना करावा लागला. या स्पर्धेत दुसऱ्यांदा विजेतेपद मिळवण्याचे तिचे स्वप्न अधूरेच राहिले आहे. तिसऱ्यांदा या स्पर्धेच्या अंतिम फेरीत प्रवेश करणाऱ्या सिंधूला दक्षिण कोरियाच्या ॲन सियोंगचे हिने 21-16 21-12 असे सरळ सेटमध्ये पराभूत केले. डेन्मार्क ओपन स्पर्धेतही सिंधूला तिनेच पराभूत केले होते.

यापूर्वी 2018 मध्ये या स्पर्धेचे जेतेपद पटकावणारी सिंधू ही एकमेव भारतीय बॅडमिंटनपटू आहे. टोकियो ऑलिंपिकमध्ये कांस्य पदकाची कमाई केल्यामुळे यंदाच्या स्पर्धेत तिच्याकडून जेतेपदाची आस होती. पण दक्षिण कोरियाच्या अव्वल ॲन सियोंगने पुन्हा एकदा सिंधूला पराभवाचा दणका दिला.