Ricky Ponting Statement Over Virat Kohli : भारताचा रन मशिन विराट कोहलीने जवळपास तीन वर्ष रखडलेले 71 वे आंतरराष्ट्रीय शतक आशिया कपमध्ये झळकावले. त्याने अफगाणिस्तानविरूद्धच्या टी 20 सामन्यात नाबाद 122 धावा करून ऑस्ट्रेलियाच्या रिकी पॉटिंगच्या 71 आंतरराष्ट्रीय शतकांच्या विक्रमाशी बरोबरी केली. याबाबत ऑस्ट्रेलियाचा माजी कर्णधार रिकी पाँटिंगने आपले मत व्यक्त केले. याचबरोबर विराट कोहली सचिन तेंडुलरच्या शतकांच्या शतकाचे रेकॉर्ड मोडणार का यावर देखील पॉटिंग बोलला आहे.

विराट कोहली सचिन तेंडुलकरचे शतकांच्या शतकाचे रेकॉर्ड मोडणार का असा प्रश्न रिकी पॉटिंगला विचारण्यात आला. त्यावर पॉटिंगने म्हणाला की, 'तुम्ही हा प्रश्न तर तीन वर्षापूर्वी विचारला असता तर मी खात्रीने हो म्हणालो असतो. मात्र खरं सांगायचं झालं तर त्याचा वेग आता मंदावला आहे.'

पॉटिंग पुढे म्हणाला की, 'मात्र मला अजूनही असे वाटते की त्याच्याकडे अजून काही वर्षे आहेत. अजूनही त्याला 30 आंतरराष्ट्रीय शतके ठोकायची आहेत. हा आकडा खूप आहे. यासाठी त्याला पुढच्या तीन ते चार वर्षात वर्षाला पाच ते सहा कसोटी शतके ठोकावी लागतील. त्याच्या जोडीला दोन चार वनडे शतके आणि एखदं टी 20 शतक ठोकावं लागेल.'

शेवटी पॉटिंग म्हणाला की, 'मी विराट करू शकणार नाही असं म्हणणार नाही. जर विराट कोहली एकदा का त्या झोनमध्ये आला तर तो धावांसाठी किती भुकेला असतो हे तुम्हाला माहिती आहे. त्यामुळे मी विराट करूच शकणार नाही असं म्हणणार नाही.'