Candidates Chess Tournament: कँडिडेट चेस स्पर्धा सध्या सुरू असून यात भारताचे खेळाडूही सहभागी झाले आहेत. या स्पर्धेच्या दुसऱ्या फेरीत भारताचा ग्रँडमास्टर विदीत गुजराथीने मोठा पराक्रम केला.

त्याने जागतिक क्रमवारीत तिसऱ्या क्रमांकावर असलेल्या आणि विजयाचा प्रबळ दावेदार असलेल्या अमेरिकेच्या हिकारू नाकामुरा याला पराभूत केले. ४७ क्लासिकल गेममधील हा हिकारूचा पहिलाच पराभ ठरला. मात्र स्टार चेस खेळाडू आर प्रज्ञानानंदला मात्र पराभवाचा धक्का बसला.

या स्पर्धेच्या पहिल्या दिवशी चारही सामने ड्रॉ झाले होते. परंतु, दुसऱ्या फेरीतील सामन्यांमध्ये निकाल लागले. प्रज्ञानानंदला भारताच्याच डी गुकेशने दुसऱ्या फेरीत पराभवाचा धक्का दिला.

तसेच अमेरिकेचा अव्वल मानांकित फॅबियानो कारुआनाने अजरबैजानच्या निजत आबासोवला पराभूत केले, तर रशियाच्या जॅन नेपोम्नियाचीने फ्रान्सच्या फिरोजा अलीरेझाला पराभूत केले.

महिलांच्या विभागात आर वैशालीने चीनच्या झोंगयी टॅन हिच्याविरुद्ध कडवी झुंज दिली. मात्र तिला पराभवाचा धक्का बसला. मात्र भारताच्या कानक हम्पीला रशियाच्या कॅटरिना लागनोविरुद्ध सामना अनिर्णित राखण्यात यश मिळाले.

आता या स्पर्धेत दुसऱ्या फेरीनंतर विदीत, गुकेश, कारुआना आणि नेपोम्नियाची हे चौघेही १.५ गुणांसह आघाडीवर आहेत. तसेच प्रज्ञानानंद आणि नाकामुरा दुसऱ्या क्रमांकावर आहेत. महिलांमध्ये टॅन आघाडीवर आहे. तिच्यानंतर हम्पी, सालिमोवा आणि लँगो आहेत. वैशाली सहाव्या क्रमांकावर आहे.